Istória Foun, AFTL Halo Abertura Liga Futsal 2023 Oka Laran Di’ak
SAPNewsTL, Dili: Assosisaun Futsal Timor-Leste (AFTL) hala’o abertura Liga Futsal Timor-Leste 2023 Oka Laran Diak sai hanesan istoria foun ida ba Timor-Leste tanba ba dahuluk AFTL realiza liga futsal iha Timor-Leste sei kompete husi klube sanulu iha divizaun dahuluk no daruak hamutuk klube 12.
“Agora ita realiza divizaun dahuluk no Daruak Liga Futsal Timor-Leste 2023 Oka Laran Diak hanesan pasu ida importante ba Timor-Leste, nune’e husi Presidente klube to’o jogador sira tenki orgullu tanba sai jogador no klube sira marka istoria foun ida iha futsal Timor-Leste nian karik klube sei lakon no jogador sira sei la joga kontinua maibe sira nia temi nafatin iha istoria futsal Timor-Leste”, dehan Prezidente AFTL Heinrique da Costa ba jornalista sira iha kampu futsal Kuartel Jeneral F-FDTL Fatuhada, Dili sesta (04/01/2023).
Prezidente hatutan, iha 2020 sira estabelese estrutura AFTL kontinua kedas realiza pra liga futsal Timor-Leste tanba iha komprimisiu hakarak dezenvolve futsal, maski ho limitasaun lubuk ida maibe la hamate espiritu desportivu husi estrutura klube sira hodi suporta rasik sira nia klube.
Nia hatutan, hafoin realiza pra liga futsal Timor-Leste klube Kampiaun Ramelau FC reprezenta klube sira iha Timor-Leste sei kompete iha AFF Futsal Club Championship 2022 iha Tailandia
Henrique informa tan, ba jogador sira utiliza momentu agora hodi hatudu kapasidade, kualidade, dixiplina ho talentu iha futsal nian tanba ekipa ida sei halo selesaun.
Nune’e, jogador selesionadu sei reprezenta Timor Leste ba kompete iha futsal nivel Azia ne’ebe sei hala’o iha nasaun Bahrain no mos klube sira husi nasaun seluk bele halo kontratu inklui bele fo orgullu ba Timoroan hotu tanba sai ona embaixador hodi hamorin Timor-Leste ba nasaun seluk liu husi futsal
Iha fatin hanesan, Xefe Estadu Maior F-FDTL Jeneral Falur Rate Laek fo benvindu ba klube ho nia jogador sira mai partisipa liga futsal ne’e no nia fo parabens ba komisaun organizador hamutuk ho patrosinador sira
“Benvindu ba klube ho nia jogador sira mai partisipa Liga Futsal Timor-Leste 2023 Oka Laran Diak tanba sai istoria dahuluk desportu nian iha Timor-Leste no mos Ha’u fo parabens ba komisaun organizador, patrosinador sira”, tenik Jeneral
Falur haforsa tan, deseju ba jogador sira hatudu jogu diak, tanba uluk luta nain se hirus matan ba kilat musan konkista Timor-Leste ukun rasik an, nune’e agora jogador sira tenki la’o ba oin no hatudu imajen di’ak ba mundu liu husi jogu sira
Entretantu, klube sira kompete iha Liga Futsal Timor-Leste 2023 Oka Laran Diak ne’e husi divizaun dahuluk klube hamutuk 10 mak Ramelau FC, Mushila FC, AS Jerman, São Francisco Xavier, Gamer FC, Mauputar FC, Boasorte FC, Caesar Dante FC, AD Samoro ho Becusse United
Divizaun daruak hamutuk 12 mak Boavista/Loriko FC, Coelho FC, B’Tal FC, Estrela Baguia FC, BAS FC, Kablaki FC, Academica FC, Grazy Horse FC, FIEL FC, Bermeta/ Saralima FC, Santa Cruz FC ho Maudoko FC nune’e iha jogu abertura Liga Futsal Timor-Leste 2023 Oka Laran Diak AD Samoro manan AS Jerman ho skore 4-1.F
Liga Futsal ne’e realiza tanba hetan apoiu masimu husi FFTL ho orsamentu montante 40,000 USD hamutuk patrosinador sira, nune’e patrosinador prinsipal Maun Oka Laran Diak apoiu orsamentu 20,000 USD, AFTL agredese tanba kompania lokal ida ba dahuluk oferese orsamentu ho montante boot ba AFTL hodi organiza Liga Futsal Timor-Leste 2023, sira mos hetan apoiu husi pratosinador Telecomsel ho orsamentu montante 1,500 USD no sira mos hetan suportasaun faru sira husi patrosinador Meja Redonda.