JKM Loke Formasaun, Professor Julio : Sai Lideransa Tenki Prontu Sakrifika An
SAPNewsTL, Dili : Grupu Juventude Kaderniza Malu (JKM) loke formasaun ba maluk estudante sira kona-ba Lideransa, objektivu husi formasaun ne’e hodi produz lideransa ne’ebe di’ak iha eskola no iha sosiedade politika nia le’et.
“Grupu JKM hari’i husi ami nain lima (5) ne’ebe mak uluk mos tuir Formasaun lideransa no oras ne’e mesak alumni husi Ensinu Sekudariu Geral (ESG) Baucau ho Objektivu katak, juventude labele garantia no dependente de’it maibe koko atu aprende halo buat ruma”. Tenik Prezidente JKM Donaltus Sarmentu Tibali ba SAPNewsTL iha Sala Fakuldade Siensia e Sosiais Politica (FASPOL), Domingo (10/07/2022).
Donaltus hateten sira organiza malu mai husi Fakuldade ida no Departamentu lahanesan maibe, ho objektivu ida atu nafatin esforsu no koko hodi halo planu fo formasaun oinsa sai lideransa ne’ebe di’ak iha sosiedada, bainhira iha grupu ida atu metin, presiza forma lideransa ho kapasidade ne’ebe di’ak.
Aleinde ne’e, Profesor Fakuldade Siensia Sosiais e Politica (FASPOL), Julio Aparicio, MHG, ne’ebe hanesan mos Orador ba formasaun ida ne’e hateten joven estudante sira ne’ebe hakarak sai lideransa tenkiser aprende ho lolos para bele lidera ema ho honestu no justu.
“Lideransa sai hanesan matadalan ba ema, tanba ita mak tenkiser fo uluk ezemplu ne’ebe di’ak mak foin ema la’o tuir, lideransa iha kriteria no reponsabidade bo’ot, iha lideransa tenke prontu foti desizaun no tenke tau as interese púbiku duke interese privadu, tanba ne’e tenke prontu sakrifika an” dehan nia.
Nia hatutan lideransa mos iha konseitu haat mak hanesan; lideransa hanesan Heransa ida, lideransa hanesan kbiit Privadu ida, lideransa (Top down authority)/nomeia no lideransa (Bottom up autority)/povu mak hili, tanba ne’e sai lideransa tenke rona didi’ak, bainhira rona didi’ak ko’alia mos di’ak, tanba ne’e ba jovens, estudante sira hotu keta lakon tempu no oportunidade atu aprende sai disiplina i depois aplika ba iha sosiedade.
Enkuantu, formasaun ne’e hetan partisipasaun maximu husi estudante sira hamutuk tolunulu resin- ualu (38), tuir planu sei kontinua fasilita formasaun ba estudante sira, formasaun refere hetan apoia maksimu husi Dosente sira inklui sira seluk
Jornalista : Antonio Altamirando & Aquelina Taec