Jogu Abertura Kopa FFTL: DIT Fahe Pontu Ho Relay Laleia

SAPNewsTL, Dili: DIT FC fahe pontu ida-ida ho ekipa adversariu Relay Laleia FC iha jogu abertura Kopa FFTL 2024.

Jogu apuramentu pool A Kopa FFTL 2024 entre Relay Laleia FC kontra DIT FC hala’o iha Estadium Munisipal Díli sesta, (10/05/2024).

Iha jogu parte dahuluk nian, bainhira jogu kick off DIT FC ne’ebe mai ho jogador partisipa Liga Timorense 2023 halo kedas presaun ba ekipa adversariu Relay Laleia maibe ekipa adversariu mai ho jogador lokal hamutuk ho jogador partisipa liga tinan kotuk halo kontra atake makaas ba DIT FC maski bola domina makaas husi DIT FC.

Ekipa rua ne’e hala’o jogu tuir estratejia ida-idak nian hodi halo presaun no kontra atake ba malu hodi hetan oportunidade atu marka golu maibe baliza rua husi ekipa rua ne’e lakoi fo oportunidade ba jogador husi ekipa rua suta bola hodi fura sira hodi rezulta sira nia redi nakdoko entaun to’o jogu parte dahuluk minutu 45 remata skore nafatin 0-0.

Kontinua ba jogu parte daruak ekipa rua muda estratejia hodi pasa bola ain ba ain maibe ekipa DIT FC nafatin domina bola, maske nune’e jogador Relay Laleia la fo oportunidade ba sira atu marka golu hodi muda skore no jogador Relay Laleia kria presaun ba jogador adversariu liu husi kontra atake.

Tama ba 58 jogador Relay Laleia FC Jose Pereira konsege marka golu husi suta bola falta tanba jogador barullu iha area 16 laran hodi difikulta baliza DIT FC la salva nia redi husi jogador adversariu nune’e Relay Laleia FC lidera jogu ho skore 1-0.

Ho skore 1-0 ne’e halo ekipa DIT FC halo presaun makaas ba Relay Laleia FC hodi hetan oportunidade atu marka golu maski ekipa adversariu halo nafatin kontra atake makaas nune’e hela minutu balun jogu atu remata DIT FC marka golu halo Relay Laleia nia redi nakdoko husi jogador Jose Santos iha minutu 90, nune’e jogu minutu 90 remata skore impata 1-1 hodi rezulta ekipa rua tenki fahe pontu ida-ida ba malu.

Depois jogu remata treinador DIT FC hatete, sira domina jogu maibe jogador sira soe oportunidade barak.

“Ohin ita hare’e ami domina jogu ne’e depois jogador DIT FC fo presaun ba jogador Relay Laleia makaas los maibe oportunidade mak hau nia jogador sira soe saugati deit, ida ne’e sai hanesan lisaun ida ba hau oinsa hadia ekipa nia jogu diak liu tan liuliu iha iha finalizasaun”, tenik alexandre.

Treinador salienta tan, sira iha vontade atu ultrapassa jogu ida ne’e, tan ne’e sira sei esforsu ho forsa tomak DIT FC sei treinu nafatin para avansa ba faze tuir mai.

Iha Fatin hanesan, treinador Relay Laleia FC Eduardo Pereira dehan, jogu rezultadu fahe pontu ho DIT FC sei iha oportunidade ba faze tuir mai, nune’e ba jogu tuir fali nia sei fo treinu hadia failansu ohin jogador sira halo iha kampu hodi prepara ba jogu tuir mai.

“Iha inisiu jogu, ha’u dehan ba jogador sira katak ohin jogu importante nune’e minimu hetan pontu ida masimu pontu tolu ne’ebe rezultadu final hetan pontu ida ne’e sei iha oportunidade ba faze tuir mai, nune’e ba jogu tuir fali nia sei fo treinu hadia failansu ohin jogador sira halo iha kampu hodi prepara ba jogu tuir mai”, Eduardo hateten

Eduardo afirma tan, Iha jogu parte dahuluk ba nia, hare’e balansu hela depois tama ba jogu parte daruak ninia jogador sira nia estamina monu tanba jogador balun joga iha Taça Rotativa Maun Boot Kayrala Xanana Gusmão no treinu selesaun nasional ba jogu AFC.

Iha jogu ne’e DIT FC halo substituisaun ba jogador nain haat no Relay Laleia FC troka jogador nain rua, jogador Relay Laleia FC nain haat hetan kartu kinur haat no DIT FC jogador ida deit mak hetan kartu kinur.

Reportajen: Augusto dos Santos