Kopa FFTL: Assa FC Laos Klube Ameansadu Ba Mushila FC

SAPNewsTL,Dili: Mushila FC konsidera Assa FC laos klube ameansadu iha Kopa FFTL 2024 tanba ekipa ne’e foun maski reforsa husi jogador diak no treinador diak foin mai husi nasaun Macau.

“Ami rekonese Assa FC ekipa foun maibe sira mai ho jogador profesional hotu ho treinador diak ida mos foin mai husi nasaun Macau, nune’e ami sei tau atensaun ba ida ne’e tanba ami sente klube Assa laos ekipa fraku maibe ami konsidera sira mos la ameansadu ba ami iha jogu aban nian”, dehan asistente treinador Mushila FC ba jornalista sira liu husi konferensia imprensa iha Xanana Sport Center sesta. (10/05/2024).

Asistente treinador hatutan, aban sira sei tun ho jogador lokal deit maioria mak joga iha liga tinan kotuk no la iha jogador estranjeiru maibe sira rekunese sira nia jogu dahuluk iha sira nia pool, nune’e sira garante manan ka minimu liu impata ho ekipa adversariu maski la fasil tanba kada ekipa adversariu mai ho jogador diak deit.

Van basten informa tan, sira prepara ho tempu badak ba kopa ida ne’e, sira nia preparasaun ba kontra Assa FC ne’e sira mai ho jogador laos ho foun tanba jogador sira tinan kotuk partisipa Liga Timorense, nune’e sira sei harame jogu kontra Assa FC iha Estadium Munispal Dili ba loron aban nian.

Iha fatin hanesan, kapitaun Assa FC Salvador Carlos hatete, sira preparasaun diak atu hasoru Mushila FC tanba  rekonese Mushila FC ekipa forte reforsa husi jogador partisipa liga tinan kotuk ho jogador selesaun nasional Timor-Leste.

“Ami iha preparasaun diak, atu hasoru ekipa Mushila iha Kopa FFTL tinan ne’e, ami rekunese ami ekipa foun hetan oportunidade, ami rekonese Mushila FC ekipa forte ho jogador barak joga ona iha liga no inklina an iha selesaun nasional, nune’e ami sei antisipa ba ida ne’e no ami optimista sei hatudu kualidade jogu iha jogu loron aban”, tenik kampitaun

Salvador aumenta tan, kona ba eskore ba sira nia jogu aban kontra Mushila FC, ne’e minutu 90 mak sei determina rezultadu.

Entretantu, Pool B ba Kopa FFTL 2024 okupa husi ekipa haat mak Mushila FC, Assa FC, ATL Mota Ain no Rai Klaran FC.

Reportajen: Augusto dos Santos