Joven JB Mate Iha Sela, FONGTIL Akuza PNTL Laiha Kapasidade
SAPNEWSTL, Dili: Relasiona ho Joven José Bernadino de Jesus Soares ne’ebe tara an iha Sela Detensaun Komandu PNTL Kaikoli Dili, liu husi Komunikadu Imprensa Forum ONG Timor-Leste (FONGTIL) Porta Voz Jorge Madeira hateten organigasaun sosiedade sivil lamenta tebes ho joven ida ne’ebe mak mate iha sela detensaun
Tuir Porta voz FONGTIL ne’e konsidera Komandu PNTL laiha kapasidade hodi kontrola membru sira iha tempu ne’ebe hakotu iis iha haris fatin
“Organizasaun sosiedade sivil lamenta ho ema ne’ebe mate iha sela detensaun komandu PNTL Municipio Dili, Organizasaun Sosiedade sivil konsidera komandante PNTL Municipio Dili laiha kapasidade para kontrola Membru PNTL sira ne’ebe halo servisu iha tempu ne’ebe Matebian Jose Bernadino de Jesus Soares, hakotu i’is iha fali Casa de banho”. Dehan Porta Voz Jorge Madeira ba Jornalista sira iha salaun FONGTIL,Sexta-feira(02/09/2022)
Entretantu, FONGTIL ejize ba parte kompetente sira liliu Ministériu Públiku delega kompeténsia ba PCIC hodi bele halo investigasaun, tanba saida Matebian hakotu i’is la uja uniforme detensaun nian, tanba sa ma tali bele mosu fali iha sela laran,
Iha sorin seluk Diretor executivu Asian Justice And Rihts(AJAR) Jose Luis de Oliveira hateten kazu joven ne’ebe mak tara an iha sela polísia, kazu ne’e nu’udar violasaun Direitus Humanus tanba ne’e AJAR husu atu halo investigasaun ba polisia sira ne’e mak iha fatin akontesimentu
“Kazu ida iha polisia ne’e akontese primeiru, ita tenke deskonfia ne’e violasaun direitus humanus tanba ema ne’e faktu mate iha sela polisia,ita tenke deskonfia suspeita polisia sira mak sai autor tanba ne’e mak presija primeiru medida husi superior PNTL atu suspende polisia hotu ne’ebe maka servisu horseik pois halo invesigasaun ba sira para atu hare será ke kazu ne’e omesidu(ema oho) ka suisidu(tara a’an)” Hateten Director AJAR
Nia hatutan katak kazu ne’e tenke entrega ba parte kompetente sira atu halo investigasaun klean no suspende polísia hotu hodi submete ba investigasaun
“Ita tenke konfia autoridade kompetente ne’e mak polisia so ke ita deskonfia polisia iha laran tanba akontesimentu ne’e iha sela laran, polisia sira hotu ne’ebe mak iha kuartel laran tenke suspende hotu no loke investigasaun ba sira, Atu oho ann entaun nia motivu ne’e saida mas hanesan ohin hau dehan se oho ann entaun nusa mak tali ne’e iha laran tanba ne’e mak hau dehan ita tenke deskonfia nafatin polisia”. nia hatete
Enkuantu, kazu refere submete ona iha prosesu investigasaun inklui matebian José Bernadino submete ona ba prosesu autopsia no oras ne’e daudaun mate isin iha ona rezidensia familia nian
Jornalista : Marcela da Silva
Editor : Ekipa Editorial