Kail Ikan Iha Lagoa, Lafaek Hamate Veteranu Blasius Bere Iha Tilomar

SAPNewsTL, Covalima: Iha loron 15 Fulan Setembru Dadersan, Veteranu Blasius Bere ho kódigu Bolakasak deside sai husi uma ba kail ikan iha Lagoa ida besik Tasi Tilomar ho sasan sira hanesan kail talin, xapeu, no bee iha bee ninin, la espera Blasius hetan atake husi Lafaek rezulta nia monu no ikus mai Lafaek tata nia no han nia isin loron sira

 

Tuir intervista liu husu via telefone ho família matebean Veteranu Blasius, Fonte Angelo Pereira informa katak iha loron 15 Fulan Setembru dader, Matebean ne’e ho sasan ba kail ikan iha lagoa mak lafaek atake nia no monu hodi Lafaek tata no han ninia isin

 

“Iha loron 15 Setembru, dadersan Veteranu Blasius deside sai husi uma ba kail ikan iha tasi laran mak lafaek atake nia hodi nia monu, ikus mai lafaek tata no han nia isin”. Tenik Família Angelo Pereira ba Jornalista SAPNewsTL liu husi via telefone, iha Tilomar, Covalima, 17/09/2023

 

Angelo hatutan, wainhira Blasius ba kail ikan, família hein to’o loraik nia seidauk fila, entaun família sira ho motor ba buka tuir hodi bolu no hakilar maibe nia la hatan, buka ba no buka mai la hetan, ikus mai hetan deit ninia sasan sira hanesan bee água, kail talin, bote no xapeu

 

Hafoin haree tiha sasan hirak ne’e, familia sira sente laran nakali no laran taridu hodi telefone malu inklui informa ba Polísia tanba buka to’o iha kalan tuku 8 liu, sira leno ho lâmpada ba mai hodi leno hetan lafaek rua toba hela iha bee laran

Polísia Nasionàl Timor-Leste Postu Administrativu Tilomar hamutuk ho ekipa Bombeirus no Komunidade sira ba fatin refere hodi hein no buka, tanba kalan boot ona balu toba no fila ba uma hodi sira buka fali iha dadersan loron 16 Fulan Setembru

Tuir mai iha dader, wainhira ekipa seguransa, bombeirus ho komunidade no família sira buka to’o tuku 10:35 dader, sira konsege hetan ninia teen ne’ebe lafaek la han no kait hela iha aitarak ida iha lagoa laran, hafoin sira haree tiha ne’e, sira mos haree bee ne’ebe haleu fatin ne’e kahur ho mina entaun sira tenta tama ba laran hodi rekolla ninia isin rohan sira ne’ebe lafaek la han hotu

 

Maske Nune’e, wainhira sira buka tuir hela lafaek mos duni tuituir hela sira tanba ne’e sira foti deit ho Matebean Blasius Bere ninia teen rohan hamutuk ho isin rohan ne’ebe Lafaek la han no husik hela ne’e hodi lori fila ba uma

Durante hetan, Matebean Blasius Bere ninia isin rohan, família matebean, ekipa taks force, bombeirus sira hamutuk Ambulânsia lori Matebean ninia isin rohan ba matebean nia rezidensia hodi kontinua ba nia prosesu fúnebre aban, iha Aldeia Faularan, Suku Maudemu, Postu Administrativu Tilomar, Munisípiu Covalima

Matebean Blasius Bere ho kódigu bolakasak, moris iha Bobonaro, 20 Jullu Tinan 1957 no mate iha loron 15 Fulan Setembru 2023 tanba hetan tata husi Lafaek iha Lagoa Tilomar

 

Blasius Bere nu’udar Aswa’in Funu Nain ne’ebe kontribui ba prosesu luta ba ukun rasik an ne’ebe determina liu husi referendum iha loron 30 Agustu 1999, hafoin ukun rasik an matebean hetan konfiansa husi populasaun sira iha Suku Maudemu sai Sefe Suku Durante tinan 7 (2002-2009).

Entretantu, Angelo Pereira husu ba peskador sira hotu iha Timor Leste laran tomak hodi kuidadu no atensaun didiak wainhira ba kail ikan iha tasi laran tanba lafaek agora la hanesan lafaek uluk ne’ebe la tata ema arbiru, maibe lafaek tata ema iha fati-fatin oioin

“Ha’u husu husu ba maluk peskador sira hodi kuidadu an no atensaun didiak wainhira ba kail ikan iha tasi tantu ba hala’o paseu iha tasi tanba lafaek barak siak no la hanesan ona tempu Ulun, diak liu ita kuida an tanba akontese ne’e susar atu salva an iha bee laran”. Nia Husu

Enkuantu, parte Protesaun Sivil iha Munisípiu Covalima fo apoia ambulânsia hodi transfere Matebean Blasius Bere husi tasi ba matebean nia rezidensia no ekipa Protesaun Sivil mos apoia ai han sira ba família iha Tilomar

Tuir dadus ne’ebé SAP News Timor-Leste asesu katak, durante fulan 9 husi Janeiru to’o Setembru, Lafaek tata ona Ema na’in lima ne’ebe ema nain tolu husi Lautém, Nain 1 husi Viiquque no ida maka dauduan ne’e iha Covalima

Jornalista : Marcela Mery da Costa