Kampionatu Nasional Boxe Amadora 2022, Boxista Nain-30 Tama Iha Grand Final
Imajen Entrega Premiu no Sertifikadu ba Boxista Manan Nain sira Kampionatu Nasional Boxe Timor Leste 2022
SAPNewsTL, Dili : Kampionatu Nasional tinan 2022 ne’ebe apoia husi Oitavu Governu Konstitusionál liu husi Sekretariu Estadu Juventude Desportu (SEJD) foin lailais ne’e, Prezidente Komisaun Organizador Mateus dos Santos hateten Kampionatu Nasionál ne’e kompete husi boxista hamutuk 87 husi klube 21 iha territóriu Timor-Leste, Boxista na’in tolunulu (30) tama iha parte final
“Ita nia boxista hamutuk nain-30 kompostu husi boxista senior ho junior mane nain 26 no feto nain haat mak kompete iha parte final kampionatu nasional Boxe Amadora Timor-Leste 2022 tanba ita jogu dala 15 ba boxista sira husi klase 48-71kg husi klube boxing 21 iha teritoriu Timor-Leste”. Prezidente Komisaun Organizador Mateus dos Santos ba jornalista sira iha Jinaziu Desportu Caicoli, Díli, Sabadu (08/10).
Prezidente Komisaun ne’e akresenta, klube sanulu nia atleta nain-30 mak tama ba parte final kampionatu nasional Boxe Amadora Timor-Leste 2022
Prezidente Komisaun Organizador Mateus dos Santos
“Ita nia klube ne’ebe nia boxista senior no junior tama ba parte final kampionatu nasional Boxe Amadora Timor-Leste 2022 maka DBC iha boxista nain rua, BBC iha atleta nain ualu, RBC nain rua, JBC nain haat, FMT iha atleta nain rua, RBC iha atleta nain ida, MBC iha atleta nain haat, LMB iha atleta nain rua, EL Matador Boxing Club iha atleta nain rua, OBC atleta nain tolu no Cavalo Boxing Club iha atleta nain ida”. Mateus dehan
Iha fatin hanesan Prezidente FBATL Abrão F. Dias Quintas hatete realizasaun kampionatu nasional refere atu prepara boxista sira ba kompetisaun internasional sira iha 2023.
Prezidente FBATL Abrão F. Dias Quintas
“Kampionatu nasional ne’e ami realiza ho objetivu atu hare’e no iha imajinasaun ba boxista ida ne’ebe maka atu reprezenta Timor-Leste ba kompetisaun internasional hanesan Asian games no Sea Games iha 2023, ami sei hareé atleta sira husi jogu boxista sira nian “, tenik Abrão
Iha sorin seluk, boxista Benfica Boxing Club Dionisio M. Ramos senti kontente tanba bele sai manan dahuluk iha kampionatu nasional Boxe Amadora Timor-Leste 2022.
Boxista Benfica Boxing Club Dionisio M. Ramos
“Ha’u sente kontente tanba ohin loron sai manan dahuluk iha klase Layan senior 51 Kg kampionatu nasional Boxe Amadora Timor-Leste 2022, ha’u sei esforsu makaas para treinu nafatin hodi prepara diak liu tan ba futuru”. tenik Boxista
Entretantu, Kampionatu refere hahu iha loron 1 remata iha loron 8 fulan outubru 2022, Programa ne’e hetan apoiu masimu husi governu atravez SEJD ho orsamentu montante $ 10,000 hamutuk ho patrosinador sira
Reportajen : Augusto dos Santos
Editor : Ekipa Editorial