Oriental Boxing Club Lamenta, FBATL La Nakloke Premiu Ba Boxista
Imajen Intervista Treinador Oriental Boxing Club Sebatião da Silva iha fatin kompetisaun Jinaziu Desportu Caicoli, Díli sabadu (08/10/2022)
(SAPNewsTL) Dili : Treinador Oriental Boxing Club Sebatião da Silva hatete, klube la satisfaz tanba Federasaun Boxe Amadora Timor-Leste (FBATL) la halo transparansia premiu ba boxista sira ne’ebe manan nain iha Kampionatu Nasional (KN) 2022.
“Komisaun Organizador no FBATL la nakloke tanba manan nain boxista senior no junior sira fo sertifikadu deit maibe premiu orsamentu ne’e sira la fo sai ba publiku atu hare’e maski SEJD fo apoiu orsamentu montante 10,000 USD ho patrosinador barak fo apoiu, nu’udar treinador la satisfaz ba FBATL ne’ebe la halo transparansia hodi halo fali segredu”, tenik treinador Oriental Boxing Club Sebastião da Silva ba jornalista sira iha fatin kompetisaun Jinaziu Desportu Caicoli, Díli sabadu (08/10/2022)
Entretantu, Treinador ne’e akresenta, iha enkontru atleta sira fo sujestaun ba FBATL no komisaun organizador ba kampionatu nasional boxe amadora 2022 katak boxista senior manan nain dahuluk hetan 200 USD, daruak simu 150 USD ho datoluk hetan 100 no boxista junior manan nain dahuluk hetan 150, daruak simu 100 no datoluk hetan 75 USD ne’ebe sira simu hanoin ne’e maibe sira la fo resposta klaru tanba sira sei hare’e mos orsamentu ne’ebe adeptu envolve mai FBATL husi billete
Sebastião informa, FBATL mos la halo transparansia apoiu husi patrosinador sira ba públiku no mos la halo tuir kompetisaun tuir standarte AIBA nian maibe sira halo tuir hakarak para hetan lukru ruma husi billete.
“FBATL mos la nakloke ba pratosinador sira ne’ebe fo apoiu, tanba FBATL la esplika dettallu iha forum ita nia federasaun nonok to’o jogu ne’e la’o, FBATL mos halo jogu la tuir AIBA (Associazione Internazionale Boxe Amatori) nian tanba jogu ba boxista sira ne’e loron lima deit maibe agora ita nia federasaun halo loron hitu liu tiha standarte AIBA nian, ita nia federasaun halo tuir sira nia hakarak para hetan lukru ruma husi ita nia adeptu sira liu husi billete”, tenik Sebastião
Prezidente FBATL Abrão F. Dias Quintas
Iha fatin hanesan Prezidente FBATL Abrão F. Dias Quintas afirma, premiu ba boxista sira sei fo sertifikadu no orsamentu ba manan nain sira iha Kampionatu Nasional husi klase 49-73 kg para hetan hotu tanba SEJD fo apoiu ona.
“Premiu ba boxista sira ami fo sertifikadu no orsamentu maibe montante mak ami seidauk bele fo sai maski SEJD fo ona apoiu orsamentu ho montante 10,000 USD, ita sei fo ba boxista sira ne’e manan iha klase hitu ne’ebe husi klase 48-73 kg ne’e para sira hetan hotu, jogu hotu mak ami hare’e tanba orsamentu husi governu la sufisiente ne’ebe ami sei tau hamutuk ho orsamentu billete nian mak foin ami deside orsamentu ba manan nain sira para boxista sira hetan hotu maibe ami sei fo premiu orsamentu ba boxista sira ho dignu”, Abrão dehan
Prezidente FBATL fundamenta, kompetisaun amadora boxista manan nunka hetan osan maibe manan sertifikadu ho medalla deit, inklui fo osan ba atleta sira maibe osan ne’ebe bele uza ba nesesidade sira nian.
Enkuantu, Boxista ne’ebe partisipa iha Kampionatu Nasionál 2022 ne’e hamutuk 30 kompostu husi feto nain haat no mane na’in 26 ho todan kilograma 48 to’o 73.
Reportajen : Augusto dos Santos
Editor : Ekipa Editporial