Kazu Ezonerasaun, PM Xanana : SNI La’os Kaer Ema & Kilat, Tau Ema Ne’ebe Hatene
SAPNewsTL, DILI– Relasiona ho ezonerasaun Diretor Geral Servisu Nasionál de Inteligencia (SNI sigla Portugés), Coronel Domingus de Camara (Amico), iha loron 1 Fulan Setembru husi karta despaixu Primeiru Ministru Kayrala Xanana Gusmão, bazeia ba dekretu lei nú. 3 /2009, 15 Janeiru. Iha ne’ebe halo públiku preokupa durante ne’e tanba LM antes ne’e hasoru kazu balun
Iha Loron 1 Fulan Setembru 2023, Primeiru Ministru Kayrala Xanana Gusmão, bazeia ba dekretu lei nú. 3 /2009, 15 Janeiru, Servisu Nasionàl Inteligénsia (SNI) nú. 1, artigu 9 liu husi despaixu nú. 006/GPM/IX/2023 ho kompetensia hanesan Primeiru Ministru nomeia ona Senhor Longuinhos Rabindranatha Tagore Domingues de Castro Monteiro hanesan Diretor Jerál Servisu Nasionàl Inteligénsia (SNI) no Senhor Egas de Araujo Moniz hanesan Diretor Jerál Adjuntu SNI
Hafoin partisipa iha Simeira ASEAN ba dala 43o ho estatutu nu’udar Observador iha Jakarta Indonénsia, Primeiru Ministru Kayrala Xanana Gusmão hatan ba jornalista sira kona-ba ezonerasaun Diretor SNI Koronel Domingos Amico, iha Aeroportu Internasionál Nicolau Lobato, PM Xanana hateten SNI ne’e tenki ho hanoin luan ne’ebe bele haree ba ameasa husi liur la’os ba kaer ema no kilat
“SNI ne’e ho hanoin ida luan, la’os ba kaer ema no lori kilat tun sa’e, tau ema ne’ebe bele haree ba ameasa husi liur, ne’e laos ba buka tuir kilat, ne’e la’os SNI, SNI ne’e ema komunika ho servisu intelijénsia indonésia ninian, atu haree ameasa saida deit husi liur mai nasaun no povu ida ne’e. lahatene servisu, atu kapitaun to’o ne’ebe mos, buat ne’e la presiza kapitaun, buat ne’e presiza ema ne’ebe hatene nia servisu, SNI ne’e saida”. Tenik PM Kayrala Xanana Gusmão ba Jornalista sira iha, Aeroportu Internasional Nicolau Lobato Comoro, 09/09/2023
Maske nune’e, maibe Eis Diretor SNI ne’e hateten, nia parte simu karta ne’e no konsidera normal tanba nasaun ema hotu-hotu nian hodi servi no lori ba oin
“Tuir lei mandatu ne’e tinan haat(4),mas ha’u hanesan expulsu maibe veteranu ne’e buat normal, nasaun ne’e Timor oan hotu-hotu nian, maibé iha buat balun ne’ebe halo ha’u mos dúvida, pergunta boot ida mai ha’u mak, dehan fali katak partidariza, ha’u ladun hatene ha’u nia servisu ne’e ba partidu saida, ne’e mak ha’u la hatene maibe hanesan kualidade veteranu ha’u nia partidu mak nasaun”. Deklarasaun ne’e hato’o husi Diretor Geral Servisu Nasionál de Inteligencia (SNI), Coronel Domingus de Camara Amico) ba Jornalista sira iha resintu (SNI), Segunda ( 04/09/2023).
Diretor sesante ne’e argumenta, Uluk 1975 los duni katak Partidu FRETILIN mak lori povu no kria FALINTIL ne’e los. Ema hotu ko’alia dehan katak tenke muda CNRM ne’e ba CNRT tanba ne’e mak muda ba CNRT, mas kuandu ukun ann hotu FALINTIL iha Aileu ne’e muda ba F-FDTL
“Iha ne’eba ami entrega Polítika ba Polítiku na’in sira, ami halo deit misaun militar, seguransa no farda ne’ebe mak ami hatais ne’e ruin no ran nia folin, ne’ebe tenke respeita ami tenke servi ba estadu la servi ba se deit”, tenik nia.
Eis Diretor SNI ne’e mos fo agradese ba Funsionáriu sira ne’ebe servisu hamutuk, maske bainhira nia tama nu’udar Diretor sempre iha grupu oioin maibe servisu hamutuk nafatin tanba objetivu ida de’it hodi lori nasaun ba oin
“Ha’u agradese tebes ba funsionariu sira ne’ebe mak iha ne’e, bainhira tama mai iha ne’e grupu oioin ne’ebe mak grupu la gosta malu, gosta malu, ha’u mai iha ne’e Timor ita hotu nian, la gosta malu ne’e buat ne’ebe mak ketak, ba nasaun nian ita nia objetivu ida deit lori nasaun ba oin”. Nia Hakotu
Jornalista : Anina Martins