Prezidente FTTL Hatan Krítika Husi Fundador FTTL Kona-Ba Prestasaun Taekwondo & Master Kim
SAPNewsTL, Dili: Relasiona ho kritika husi Esi Presidente Federasaun Taekwondo Timor-Leste (FTTL) Angelo Neves kona-ba prestasaun Taekwondo ne’ebe tun tanba kauza husi treinador ne’ebe laiha imparsialidade, Presidente FTTL Gabriel da Costa responde nia parte sente orgullu ho Master Ki Tae Kim sai treinador selesaun baa, nia (Master Ki Tae Kim) mai Timor-Leste tanba federasaun servisu hamutuk ho governu Korea Sul liu husi Embaixada Korea Sul iha Timor-Leste no Kukkiwon iha Korea Sul.
“Ami atu klarifika ba públiku kona ba treinador Master Ki Tae Kim ne’e tuir prosesimentu, FTTL servisu hamutuk Embaixada Korea Sul iha Timor-Leste nune’e FTTL halo aproximasaun ho kukkiwon iha Korea Sul hodi husu atu haruka treinador taekwondo mai iha Timor-Leste treinu atleta selesaun nasional taekwondo”,
“Tan ne’e treinador mai iha Timor-Leste ne’e mos tuir selesaun mak kukkiwon rekomenda mai laos tur-tur mai deit, maibe liu prosesu naruk tebes tuir lolos Timor-Leste orgullu no kontente ema nain ba taekwondo husi Korea Sul mai apoiu iha selesaun nasional taekwondo Timor-Leste nian”, dehan Prezidente FTTL Gabriel da Costa ba jornalista SAPNewsTL iha jinajiu desportu Dili, sesta (08/09/2023).
Prezidente hatutan, lori FTTL nia naran atu klarifika ba públiku katak Eis Prezidente FTTL Angelo Neves sira rekunese fundador duni maibe kona ba eis prezidente nia intervensaun FTTL la iha transparansia ba hili atleta selesaun nasional ne’e lalos
“Atu hatete deit katak federasaun ne’e iha estrutura, uluk iha eis prezidente Angelo Neves nia tempu to’o mai agora sira halo selesaun ba atleta nasional ne’e transparansia ba ema hotu liu husi kampionatu nasional, hili atleta manan nain dahuluk to’o datoluk tama selesaun nasional hala’o prepara ba kompetisaun internasional, nu’udar prezidente federasaun bele uza kompetisia para hili atleta deit maibe nia lakoi ida ne’e atu akontese tanba hakarak evita kritika husi públiku”. Nia sublinha
Gabriel informa tan, federasaun la iha kuñesementu kona ba Master Ki Tae Kim ne’e sai husi militar tama ba peace corp taekwondo hodi mai Timor-Leste maibe federasaun haruka master Ki Tae Kim ne’e tuir baze legal mak servisu hamutuk ho governu Korea Sul liu husi embaixada Korea Sul iha Timor-Leste
Pedidu husi FTTL ba kukiwon iha Korea Sul mak haruka treinador Master Kim mai ne’e no kukiwon sira mos husu FTTL halo avaliasaun ba Master Kim karik nia servisu ladun diak, FTTL hato’o para kukiwon halo mudansa maibe to’o agora federasaun hare’e Master Kim hatudu prestasaun diak fo apoiu maximu ba selesaun nasional laos tuir intervensaun eis prezidente FTTL Angelo Neves fo sai ona ne’e
Nia afirma tan, apoiu FTTL husi governu no orsamentu ba ezame nian kada dojan sira hatama 2,50 USD mai federasaun kada fulan tolu, durante tinan ida ne’e FTTL utiliza fali hodi selu administrasaun federasaun, ba kopi dokumen no sertifikadu, apoiu sira ne’e tenki tuir dalan legal estatutu ho rejimentu FTTL nian, tan ne’e sira sei aprezenta ba fundador sira antes mandatu estrutura atual FTTL remata ona liu husi asembleia Jerál tanba sira nia mandatu to’o 2025.
Iha sorin seluk, treinador selesaun nasional taekwondo Timor-Leste Master Ki Tae Kim hatete, nia laos world taekwondo peace corp maibe nia ema kukkiwon no atleta iha Korea Sul.
“Ha’u laos world taekwondo peace corp, ha’u ema kukkiwon tanba iha 1990 to’o 2010 nu’udar atleta iha Korea Sul hetan medalla barak, karik Eis Prezidente FTTL Angelo Neves la fiar, ha’u bele komunika ba kukkiwon ho world federasaun taekwondo atu nune’e sira bele esplika se mak ha’u”, tenik Master Kim
Master salienta tan, nia lori atleta Ana da Costa ba nasaun Pakistan hetan medalla osan mean ne’e, ne’e laos try out tuir deklarasaun eis prezidente FTTL Angelo Neves fo sai ona ne’e maibe ne’e Pakistan open, partisipa mos atleta nasional husi Pakistan ho Iran inklui mos partisipa husi klube sira iha Pakistan
nune’e atleta Ana da Costa hetan medalla osan mean tanba konsege manan atleta nasional husi Pakistan rasik no partisipa iha Paskitan open nia level J2 boot liu atleta sira partisipa Sea Games tanba sea games level J1 deit, iha taekwondo level husi J1 to’o J20.
Enkuantu, prestasaun Master Ki Tae Kim hatudu ona hamutuk atleta nasional taekwondo Timor-Leste mak atleta ida hetan medalla osan metan iha Sea Games 2022 iha Vietnam, atleta nain tolu hetan medalla osan metan tolu iha Sea Games 2023 iha Cambodia no atleta ida hetan medalla osan mean iha Pakistan Open.
Antes ne’e Eis Presidente FTTL Angelo Neves, kestiona kona ba prestasaun federasaun taekwondo ne’ebe tun no selesaun nasional ne’ebe hili la ho transparansia no imparsialidade tanba atual presidente Taekwondo Gabriel da Costa lidera mos nia klube ida, maibe Lider FTTL ne’e konsidera deklarasaun ne’e lalos.
Fundador ho Eis Prezidente Federasaun Taekwondo Timor-Leste (FTTL) Angelo Neves hatete, prestasaun ba atleta nasional taekwondo iha jogu internasional tun tanba problema iha treinador.
“Prestasaun atleta selesaun nasional taekwondo Timor-Leste monu tanba federasaun la iha sistema diak promove atleta futuru jerasaun foun sira no problema iha treinador tanba treinador selesaun nasional tenki foku ba treinu atleta selesaun nasional deit para oinsa bele halo atleta sira hetan prestasaun diak,”
“La’os sai mos treinador klube ne’e otomatikamente la iha impasialidade atu hili atleta tanba nia hili deit nia atleta para hodi bele promove no hasa’e klube nia naran la hare’e ona atleta diak husi dojan sira seluk iha Dili no munisipiu sira maski atleta husi dojan sira seluk mos diak barak”, dehan fundador ho Eis Prezidente FTTL Angelo Neves ba jornalista SAPNewsTL iha Bairro Formosa, Dili kuarta, (06/09/2023).
Fundador ne’e hatutan, FTTL atu hetan atleta diak sira liu eventu sira tanba iha eventu sira hetan atleta barak kompete, tuir lolos estrutura FTTL atual iha programa ka planu ba prestasaun no estratejia motiva atleta sira ho teknika foun para atleta sira iha mudansa diak liu tan
“Prepara atleta sira bele hetan prestasaun diak liu tan maibe agora ema hotu hare’e prestasaun ba atleta taekwondo tun liu no naran monu tanba manajementu lideransa federasaun taekwondo la iha inisiativa promove maibe hamate fali”. Nia kestiona
Nia akresenta, pratikamente atleta nasional tenki istima sira ho diak tanba sira ne’e eroi nasaun liu husi atividade taekwondo rasik maibe agora la iha imparsialidade ba hili atleta sira entaun atleta balun muda fali ba modalidade seluk akontese duni foin daudauk dojan tomak ida muda tanba iha “pilih kasih” no la iha transparansia husi treinador selesaun nian
Foin daudauk atleta rezigna husi selesaun nasional mos sira bolu fali sai fali atleta nasional no la treinu tan ba kompete iha Sea Games 2023 iha Cambodia, tan ne’e treinador hanesan rezigna an ona tanba la iha kapasidade lori atleta ba prestasaun diak
“Estrutura atual FTTL daudaun ne’e kontinua hatudu diak kontinua uluk nian no realiza saida mak estrutura anterior sira la konsege halo maibe agora sira mai ho programa ketk depois hare’e hatudu prestasaun ka lae”. Nia dúvida
Fundador ne’e hatete tan, daudaun ne’e mos FTTL la halo transparansia ba fundador sira kona ba apoiu mai husi governu no atleta sira ezame nian maibe federasaun tenki hatene katak fundador ne’e nain estrutura atual FTTL ne’e hanesan jestor hetan konfiansa deit maneja fundu internal ho external para dezenvolve federasaun hetan prestasaun diak iha jogu internasional sira
Prestasaun atleta sira tun daudaun ne’e, fundador sira sei tur hamutuk deside liu husi halo evaluasaun no avaliasaun hamutuk ho estrutura atual FTTL liu husi kria enkontru extraordinariu ida iha tinan para hare’e frakeza ne’ebe iha hodi buka solusaun no salva modalidade Taekwondo ho prestasaun diak
Reportajen: Augusto dos Santos