Kazu Oho Natalino, Família Husu MI Reforma Oknum PNTL Iha Lautém

SAPNewsTL, DILI- Relasiona ho konfrontu tuda malu entre Juventude deskonhesidu husi aldeia Kaut no Assalainu iha Postu Administrativu Lospalos ne’ebe mak rezulta estudante Natalino Soares lakon nia vida. Familia la menta no husu Ministeiru Interior(MI) atu reforma oknum Polísia Nasional Timor Leste (PNTL) ne’ebe mak iha fatin akontesimentu Maibe la halo intervensaun

Tuir Porta Voz Jorge Da Costa,hateten katak familia husu ba komandu geral atu investiga oklum polisia ne’ebe mak iha fatin refere maibe la halo atuasaun ba konfrontu ne’e. Família vitima ezize tenke lori autor sira ne’e ba tribunal hodi prosessa tuir lei ne’ebe mak vigora iha nasaun RDTL

“iha ne’e ami hato’o ami nia ezizensia,ba servisu PNTL Munisípiu Lautem nian. Primeiru ami familia ezize ba parte komandu geral PNTL nasional atu investiga membru polisia iha munisipiu Lautem ne’ebe mak iha fatin akontesimemtu maibe la halo atuasaun no husik deit kriminozu sira baku Ha’u nia alin to’o grave”Dehan porta vos,Jorge Da Costa ba jornalista sira iha, kampu Baru,sabadu(08/07/2023)

Nia haktuir katak, banhira matebian ne’e ema baku grave ona, oknum polisia ne’ebe mak iha fatin refere la bolu ambulansia hodi tula matebian ba hospital, ikus familia matebian mak tula ho tum tum(ojek) hodi ba hospital.

“Banhira ami nia alin grave membru polisia sira ne’ebe iha fatin akontesimentu la iha inisiativa atu bolu ambulansia hodi tula alin ne’e ba hospital, maibe husik deit alin ne’e iha fatin akontesimemtu no finje la hatene problema”.

“Bainhira supeitu sira halai hotu no husik hela alin Natalino De jesus Soares nia mesak latan hela iha fatin akontesimentu, sorte familia balun mak hetan no ajuda mos husi seguransa sivil balun,hodi tula alin ne’e ho ojek(Tum Tum), hodi lori nia ba hospital hodi halo tratamentu mesmu ho distansia ne’ebe mak dook no dalan ne’ebe mak att”Tenik nia

Hatutan nia ho razaun hirak ne’e nu’udar familia hato’o sira nia ezizensia ba PNTL munisipiu Lautem atu kaer autor kriminozu sira no tenke submete ba tribunal tanba vitima Natalinu De jesus Soares nunka mete problema saida deit, no hanesan inosente lolos ba problema refere.

Enquantu familia vitima husu ba PNTL munisipiu Lautem katak kazu ne’e tenke entrega ba PCIC hodi bele aselera lalais tanba familia husi vitima lakon konfiasa ba PNTL munisipiu Lautem Ho razaun katak banhira akontesimentu refere oklum polia balun hala’o hela seguransa maibe la aselera situasaun to’o ikus estudante Natalino De Jesus Soares lakon vida

“Iha akontesementu ne’e membru polisia sira balun halo hela seguransa maibe la tau importansia no la halo prevensaun ba problema ne’ebe mak iha, i aumesmu tempu la halo medida prevensaun ba problema maibe fo livre nafatin ba autor sira hodi halo nafatin agresaun fiziku to’o vitima hetan grave to’o ikus Labele salva nia vida”Nia informa

Nia esklarese katak”Depois polisia kaer autor sira por volta seis(6), possoas ba detein, maibe husik fila-fali no livre. Polisia sira la halo detensaun ruma ba autor sira hodi kumpri 72 horas, tuir kodiku prosesu penal ne’ebe mak iha”

Porta vos ne’e husu ba ministru interior atu reforma oklum membru polisia ne’ebe mak iha fatin akontesementu maibe la halo prevensaun to’o ikus estudante Natalino De jesus Soares lakon nia vida

“Ami familia vitima husu ba governu espesial Ministru interior atu muda ou reforma imediata ba oklum membru PNTL ne’ebe mak iha fatin akontesimentu Maibé la halo atuasaun imediata ba problema ne’e. Kazu ne’e ami familia hato’o ona ba exelensia Ministru interior atu halo samada ba servisu PNTL munisipiu Lautem no tempu badak nia laran exelensia sei halo aksaun imediata ba profisionalismu ba membru PNTL munisipiu Lautem” Nia hakotu

Entretantu, Tuir Informasaun Ne’ebe SAP News TL asesu katak PNTL Munisípiu Lautém detein ona autor Nain Neen ne’ebe deskonfia baku Mate Estudante Natalino Soares iha Lospalos no submete ona ba Prosesu investigasaun iha Ministériu Públiku

Matebean Natalino Soares Familia halot ona iha Suku Fuiluro Postu Administrativu Lospalos Munisipiu Lautém iha loron hirak liu ba.

Jornalista : Marcela Mery da Costa