KFFL Fasilita Formasaun Ba Foinsa’e Hamutuk 180 Iha Lautém
Imajem : KFFL halo abertura formasaun materia análisa sosial báziku ba foinsa’e sira iha Suku Cotamuto, Luro, 02/05/2024.
SAPNewsTL, Lautem: Organizasaun Juvenil Klibur Foinsa’e Fini Luro (KFFL) fasilita formasaun ba foinsa’e sira hamutuk 180 iha Postu Administrativu Luro Munisípiu Lautem
Iha entrevista ho Prezidente Klibur Foinsa’e Fini Luro Jorge Alves da Costa haktuir formasaun ba etapa dahuluk remata ona no sertifika ona formandu sira hamutuk haatnulu resin lima iha loron 10 fulan Abril liu ba.
“Ohin ami fo tan formasaun ba etapa daruak ninian tanba etapa dahuluk ami hahú iha fulan Fevereiru no remata ona iha loron 10 fulan Abril, iha ne’ebe ami fo formasaun sira hanesan Diskursu Públiku no Analiza Sosial Baziku (ANSOS) nomos ami sertifika ona formandus sira hamutuk haatnulu resin lima”. Dehan Prezidente Klibur Foinsa’e Fini Luro Jorge Alves da Costa iha Sede KFFL Luro Lautem, 2/05/2024
Prezidente KFFL ne’e hatutan formandus sira ne’ebe tuir formasaun ba etapa daruak nian hamutuk atus ida ualu nulu kompara ho etapa dahuluk ho deit haatnulu resin lima.
“Ohin ami fasilita formasaun sira ba etapa daruak ne’ebe sei kapasita foinsa’e sira hamutuk atus ida ualunulu (180) iha Postu Luro ne’ebe sei tuir formasaun sira hanesan Diskursu Publiku, Konseitu Debate, Kapasitasaun Komputador no Formasaun Jornalizmu”. Tenik Jorge
Jorge haklean formasaun ne’ebe sira halo ne’e ho gratuita tanba organizasaun ne’e voluntariu nune’e voluntariamente forma foinsa’e sira ho gratuitu.
“Formasaun ne’ebe ami fo ne’e fasilita ho gratuita tanba ami simu ona, ami hakarak fahe atu foinsa’e hotu bele asesu nune’e la selu, ami hakarak de’it atu oinsa forma maluk foinsa’e sira atu bele sai foinsa’e ne’ebe matenek”. Nia salienta
Imajem : Formandu Alonia Pinto
Entretantu, formandu Alonia Pinto agradese tanba bele hola parte iha KFFL hodi tuir formasaun sira ne’ebe fasilita husi lideransa sira husi KFFL.
“Ha’u sente orgullu no agradese tebes tanba bele tuir formasaun Diskursu Publiku husi Organizasaun Voluntaria KFFL, ha’u kontente tanba ha’u bele mudansa no ohin sira loke tan ba faze daruak ha’u tuir tan kapasitasaun komputador no formasaun Jornalizmu, ha’u sei tuir to’o hotu hodi eleva tan ha’u nia kuñesimentu iha area sira ne’e”. Alonia hatete
Enkuantu, formasaun ne’e hala’o iha fatin ha’at hanesan Sede KFFL Luro Sentru, EBC Cotamuto, EBC Odofuro no EPE CALU Abere.
Jornalista: Denilia Soares & Leonel Alves