Klube Portu Taibesi Prontu Kompete Iha Liga Timorense 2022-2023
Imajen Prezidente Klube Porto Taibesi Ivodio Andrade, iha kampu Taibesi, Dili kuarta, (25/01/2023).
SAPNewsTL, Dili: Klube Portu Taibesi prontu kompete Liga Timorense epoka 2022-2023 ne’ebe Federasaun Futebol Timor-Leste (FFTL) ho orgaun Liga Futebol Timor-Leste (LFTL) sei realiza iha loron 17 fulan fevereiru 2023.
“Rejistrasaun nian hein deit desizaun husi treinador sira no manajementu katak jogador sira ekipa nian preparadu no forsa iha loron segunda ka tersa semana oin klube prontu ba rejistu iha orgaun LFTL maibe klube Portu Taibesi mos prontu partisipa Liga Timorense epoka 2022-2023”, dehan Prezidente Klube Porto Taibesi Ivodio Andrade ba jornalista sira iha kampu Taibesi, Dili kuarta, (25/01/2023).
Prezidente ne’e hatutan, klube nia jogador daudaun ne’e jogador sira iha tinan 2021 lori klube Porto Taibesi promosaun mai divizaun dahuluk hamutuk nain-20 ne’e prontu hela maibe sira sei tenta buka jogador nain hitu ne’ebe iha esperensia joga iha divizaun dahuluk Liga Timorense iha tinan hirak liu ba husi baliza, mediu no avasadu para kompleta kriteria jogador husi orgaun LFTL, iha tinan kotuk sira treinu no preparadu ona maibe liga la konsege la’o iha momentu ne’eba, agora sira hahu treinu fila fali.
Ivodio mos husu ba ba FFTL ho orgaun LFTL se bele halo konferensia impresa ida ba publiku hodi anunsia katak Liga Timorense epoka 2022-2023 fiksu ona hahu iha fulan fevereiru para fo garante ba klube sira tanba iha tinan kotuk parte rua ne’e dehan jogu lao maibe to’o ikus Liga Timorense momentu ne’eba la iha para keta halo klube sira gasta orsamentu ba preparasaun.
Treinador klube Porto Taibesi Miro Bento
Iha fatin hanesan treinador klube Porto Taibesi Miro Bento hatete, Liga Timorense hahu iha fulan fevereiru mai urujensia ka derepente halo klube hotu problema ba preparasaun, la iha treinamentu eseptu husi klube sira ne’ebe nia jogador tama selesaun nasional
“Ita nia Liga Timorense sei hahu iha fulan fevereiru ne’ebe mai ho urjensia ka derepente, klube hotu la’os Porto Taibesi deit problema ba preparasaun la iha treinamentu eseptu ita nia klube sira nia jogador tama selesaun nasional hanesan AD SLB Laulara, As Ponta Leste ho Emmanuel FC”, tenik treinador
Treinador ne’e akresenta tan, sira konsege treinu ona kapas los iha fulan haat liu ba katak Liga Timorense atu hala’o maibe la konsege ne’ebe agora sira tenki prepara husi zero, daudaun ne’e sira nia jogador hamutuk nain-20, sira sei buka tan jogador mai reforsa ekipa para nafatin kompete iha divizaun dahuluk Liga Timorense no sira mos iha planu atu kontratu jogador estranjeiru sira maibe buka uluk jogador lokal tuir pozisaun klube hakarak iha kapasidade ho jogador estranjeiru kompete ho ekipa seluk, sira sei la foti tan jogador estranjeiru maibe la iha sira sei buka jogador estranjeiru para reforsa ekipa.
Reportajen: Augusto dos Santos