Komísiu Últimu CNRT Iha Tasi-Tolu, Xanana : Osan Billiaun $ 10 Tenki Halo Investigasaun
SAPNewsTL, Dili : Iha kampanha loron ikus, Presidente Partidu Congresso Nacionál Reconstrução Timorense (CNRT) Kayrala Xanana Gusmão haktuir, wainhira CNRT manan tenki halo auditória no investigasaun ba orsamentu jeral estadu hamutuk billiain $ 10 ne’ebe gasta durante tinan lima
“Se Partidu CNRT manan, Ita Tenki halo auditória no investigasaun ba osan billiaun$10 ne’ebe gasta ona, ita tenki la’o tuir gasta osan hira, estraga osan hira no restu iha ne’ebe, laiha akontabilidade, ne’e tenki halo investigasaun didiak, tanba CAC nonok liu, Tribunal das Contas no Inspesaun Jeral Estadu mos taka tiha matan”, Tenik Presidente Partidu CNRT Kayrala Xanana Gusmão, liu husi komísiu iha tasi-tolu, 18/05/2023
Lider Karismátika ne’e mos kestiona kona-ba osan sexta-bazika, tenki halo investigasaun didiak, tinan lima ne’e gasta osan oinsa
“Tinan ba tinan gasta osan hira no gasta oinsa, sexta-bazika laiha relatóriu, tanba ne’e sei halo investigasaun, laiha retóriu anuais, sira laiha planu no programa, Partidu FRETILIN, PLP no KHUNTO bolu malu deit ka haree nia ema deit, Uma naroman ba povu halo deit ba militante partidu, estrada aat barak ”. Nia hatete
Iha parte seluk, Xanana Gusmão mos konsidera ferik no katuas sira mak heroi nasionál tanba ho nia pregu mak Timor Ukun An, inklui estadu mos sei tau atensaun ba ema defisiente sira hotu iha Timor Leste
“Ferik no Katuas sira ne’e la’os idozu, sira mak herois nasionais, imi nia vida iha loron ikus ikus ne’e labele sai difisil, sira presiza hetan atensaun espesial husi estadu inklui ema ho defisiente hotu iha Timor Leste”. Nia promete
Entretantu, Iha Komisiu ne’e hetan partisipasaun maksimu husi militante sira iha kapital Dili, komísiu ne’e hetan seguransa husi PNTL, BOP no observasaun husi observador nasionál no internasionál sira
Tuir Observasaun SAP News nota katak komisiu loron ikus Partidu CNRT nian ne’e halibur ema barak liu kompara ho partidu sira seluk, kampanha ne’e mos la’o iha paz, amizade no estabilidade
Jornalista : Ermelinda Soares