Ro Jaco No Betanu Hetan Manutensaun Husi Kompanha Vikas Indonesia
SAPNewsTL,Dili : Hafoin halo tenderizasaun iha fulan hira liu ba, Governu liu husi Ministériu Defeza hetan ona kompania hodi halo manutensaun ba ro rua iha komponente naval hanesan Ro Jaco no Betanu ne’ebe avaria durante ne’e
“Ami halo tenderizasaun iha fulan hira liu ba, ami hetan ona kompania naran Vikas husi indonezia ne’ebe agora halo hela manutensaun ba ro rua, Jaco no Betano ne’ebe ho faze rua halo manutensaun ba parte ro laran maka haree mesin, sistema no instalasaun no ida seluk mak hare’e parte exterior nian ne’ebe haree ba lolon, reparasaun no pinta fila fali tanba kleur ona la halo manutensaun”, Diretor Jeral Ministeriu Defeza Nuno Carvalho ba Jornalista sira iha rezidensia komponente naval Hera, Dili sesta (16/09).
Diretor ne’e akresenta, uluk sira halo tenderizasaun ona ne’ebe felizmente agora iha ona tanba iha tinan rua liu ba orsamentu ba sentraliza iha Kafi ne’ebe sira la konsege realiza maibe sira aloka orsamentu ne’e mai iha Ministeriu Defeza hodi husu autorizasaun Primeiru Ministru nian ne’ebe fo ona autorizasaun ba Ministeriu Defeza tinan ne’e sira konsege halo ona tender ba manutensaun ro rua Jacó ho Betano
Nuno informa, orsamentu ba manutensaun ro rua ne’e ho millaun tolu ne’ebe Ministériu Defeza aloka, maibe sira mos ezize governu atu sosa tan ro foun ba komponente naval para aumenta ho ro ne’ebe halo hela manutensaun.
“Orsamentu ba manutensaun ne’e ho montante 3,000,000 USD ne’ebe uluk aloka ba Kafi ne’e mak aloka fila fali mai Ministériu Defeza, ami garante ro rua ne’e komponente naval bele uza fila fali tanba agora ami hetan ona autorizasaun husi primeiru ministru, Ministériu Defeza ezizi nafatin para ba oin bele sosa tan ro foun ba komponente naval para aumenta ro rua ne’ebe halo manutensaun ne’e”, Tenik Diretor.
Iha fati hanesan Xefi Estadu Maijor Jeneral F-FDTL tenente Domingos Raul “Falur Rate Laek” hatete, membru komponente naval aumenta maibe fasilidade ro avaria tan ne’e governu prometidu para atende situasaun ne’e.
“Ita nia membru komponente naval F-FDTL aumenta nafatin maibe fasilidade ba ro avaria hela tan ne’e ita nia governu prometidu para atende situasaun ida ne’e, projetu boot hanesan manutensaun ba ro ne’e iha Ministeriu Defeza tanba orsamentu sira mak tau F-FDTL haree ba servisu instituisaun nian”, dehan Jeneral.
Reporter : Augusto dos Santos
Editor : Luis Pailofo