Uza Osan Rasik Sosa Sapatu, F-FDTL No MD Sei Buka Solusaun
(SAP News TL) DILI : Governu liu husi Ministériu Defeza hamutuk instituisaun Falintil Forsa Defeza Timor Leste (F-FDTL) sei buka solusaun ba membru F-FDTL sira ne’ebe uza osan rasik sosa sapatu hodi hala’o servisu.
“Ha’u hatene membru sira uza osan rasik hodi sosa sapatu hodi hala’o servisu, maibe ami sei haree hamutuk ho Ministériu Defeza hodi fo solusaun ba problema ne’e”, hatete Xefi Estadu Maior Jeneral F-FDTL Tenente Domingos Raul “Falur Rate Laek” ba jornalista sira iha rezidensia Komponente Naval Hera, Dili, Sexta (16/09).
Iha fatin hanesan Direktor Jeral Ministeriu Defeza Nuno Carvalho hateten Membru F-FDTL uza osan rasik sosa sapatu nia seida’uk hatene maibe karik hanesan ne’e, nia husu membru sira aprezenta mai Ministeriu Defeza para buka solusaun ho instituisaun F-FDTL.
“Membru F-FDTL uza osan rasik hodi sosa sapatu ne’e ha’u seida’uk rona ida ne’e tanba Ministeriu Defeza kada tinan sosa farda no sapatu ba Membru F-FDTL sira, jestaun ne’e komandu forsa defeza Timor Leste mak jere ida ne’e, ha’u husu membru sira bele ko’alia asuntu ne’e hodi buka solusaun hamutuk ho instituisaun F-FDTL”, tenik Diretor
Entretantu, Direktor ne’e akresenta, kada tinan governu tau orsamentu tuir kompeténsia Ministeriu nian husi montante millaun 1,000,000 USD mai kraik depois Ministeriu Defeza tau orsamentu ba sosa farda no sapatu, karik la to’o tanba membru aumenta no nesesidade sira seluk mos aumenta, maibe sei kordena malu nafatin ho instituisaun F-FDTL hodi fo solusaun.
Jornalista : Augusto dos Santos
Editor : Luis Pailofo