Kondekora Doutor 12 ! UNTL Fo Agradese Ba PR Horta
Imajem : Doutores Kondekoradus husi FEST-UNTL, Kampus Hera, 23/05/2024
SAPNewsTL, Dili : Universidade Nacional Timor Lorosa’e (UNTL) nia Fakuldade Engenharia Siensia no Teknolojia (FEST-UNTL) selebra no fo agradese ba kondekorasaun ne’ebe Sua Exselénsia Presidente Repúblika Jose Ramos Horta atribui ba doutor na’in 12 husi FEST.
Iha diskursu Vise Reitor Asuntu Akadémiku no Garante Kualidade Samuel Venancio Freitas fo parabens ba doutor nain 12 ne’ebe hetan kondekorasaun husi Prezidente Repúblika Jose Ramos Horta.
“Lori reitor nia naran hato’o parabens ba doutor na’in 12 ne’ebe simu kokdekorasaun, imi kontinua halo buat ne’ebe úniku no halo fakuldade engenharia sai role model iha UNTL”. Dehan Vise Reitor UNTL Samuel Venancia Freitas liu husi nia diskursu iha auditorium FEST, 23/05/2024
Imajem : Vise Reitor Asuntu Akadémiku no Garante Kualidade Samuel Venancio Freitas
Samuel reforsa FEST sai role model tanba Departamentu Engenharia Sivil hetan akreditasaun A iha nivel nasional no úniku iha UNTL, inklui haree husi inovasaun no dizitalizasaun ne’ebe lidera husi produtu ida husi Fakuldade Engenharia mak Professor Frederico Amaral ne’ebe agora daudaun diziliza ona fakuldade sira seluk, nune’e mos iha infraestrutura ne’ebe adekuadu no avansadu.
Dekanu FEST-UNTL Adalfredo Ximenes mos sente gratidaun no fo agradese ba Presidente Repúblika tanba bele rekunhese no fo kondekorasaun ba Doutor 12 iha UNTL.
“Sente orgullu boot ida ba FEST tanba nia doutor na’in 12 simu kondekorasaun husi Presidente Repúblika, ita hotu agradese ba Presidente Republika tanba kondekora doutor 12 husi FEST, lahaluha ita mos fo agradese ba JICA Timor-Leste ne’ebe apoia ona FEST no fo espasu ba dosente sira ba kursu iha Japaun hodi hasai doutoramentu no agradese mos ba Embaixador Portugal ne’ebe fo mos oportunidade kursu doutoramentu ba dosente sira iha Portugal”. Adalfredo da Silva Ximenes dehan.
Kondekorasaun ne’ebe Presidente Repúblika atribui ba doutor na’in 12 ne’e hala’o iha salaun nobre lahane Dili, iha Loron 19 Fulan Maiu Tinan 2024.
Partisipa iha serimonia agradesimentu ne’e mai husi Vise Reitor UNTL, Estrutura Fakuldade Sira, Korpus Dosentes,estudantes no konvidadus sira.
Jornalista : Marciana da Conceição