Kondena Aktu Kriminozu Iha Uatulari, CNRT Husu Lider Partidu Sira Kontrola Atetude Militantes

SAPNewsTL, Dili : Relasiona ho aktu violentu ne’ebe akontese iha Suku Afaloikai, Postu Uatulari Munisipiu Viqueque (27/04/2023) ne’ebe halo ema nain 16 sofre kanek, no uma 7 hetan estragus, Partidu Congresso Nacional Reconstrução Timorense (CNRT) liu husi komunikadu imprensa kondena makaas ba militante Partidu balun ne’ebe halo agresaun fiziku ne’e hasoru militante CNRT

Tuir Equipa Porta Voz Partidu CNRT Roger Soares haktuir, “Partidu CNRT Kondena makas kona ba faktus ne’ebe hatudu husi individu no grupu antidemokrátiku ne’ebe halo agresaun uza Partidu Fretelin nia atributu hodi hasoru militante no apoioante Partidu CNRT iha munisipiu viqueque postu watulari, harahun uma no hakanek ema lubuk ida, CNRT kondena makas aktus insidente akontese iha Wailili, Gariwai, Vemasse no RAEOA”. Tenik Porta Voz Partidu CNRT Roger Soares ba Jornalista sira, iha Sede CNRT Bairo dos Grilhos Dili, 28/04/23.

Nia fundamenta, “Partidu CNRT haree aktus brutalizmu, anarquismu no kriminozu sira ne’e kondenavel, tanba prejudika teb-tebes ba prinsipius no valores demokrasia, Liberdade no direitu siviku sidadaun nian, liliu aktus no insidente sira ne’e bele kontribui ba instabilidade nasional no populasaun enjeral moris la hakmatek, maibe moris iha trauma no tauk nia laran”. Nia dehan

CNRT mos apresia ba servisu ne’ebe autoridade seguransa sira presta durante periodu kampanha iha atuasaun ba provokasaun ne’ebe akontese iha parte identifikadu de risku. CNRT apela no enkoraja autoridade Polisia Nasional de Timor-Leste (PNTL) atu fo seguransa maximu ba militante sira atu labele provoka malu, iha momentu kampanha no eleisaun ne’ebe halo atuasaun ho imparsialidade, profesionalismu no dedikasaun hodi asegura lei-ho-ordem públiku

CNRT husu ba lider partidu politiku sira hotu atu kontrola atitude militantes, apoiantes no simpatizantes durante periodu kampanha hodi labele provoka situasaun atu hamosu insidentes ne’ebe provoka krime no estragus ba populasaun ka militantes huis partidu sira seluk

Iha Parte seluk, Roger hatete, Partidu CNRT mos toma nota ba notifikasaun ne’ebe haruka husi CNE kona- ba cumprimento da lei no utilizasaun uniforme partidu seluk durante kampana.

“CNRT determinadu no sempre halo esforsu makas tau iha pratika regras no lei sira ne’ebe vigora ona, Partidu sei tenta atu kontrola komportamentu husi millitante sira hotu iha kampanha sira tuir mai, wainhira iha situasaun animu nia laran durante kampanha, iha ne’ebe ema hotu koalia ho emosaun aas, defisil tebes atu kontrola apoiantes sira ne’e nia atitude”. Nia hatete

CNRT apela ba nia kuadrus, militantes, simpatizantes no apoiantes sira hotu atu kontinua komporta ho didiak, disiplina, respeitu malu tuir valores fraternidade humana, liu-liu kompromete hodi salva estadu de direitu demokratiku liu husi eleisaun ida ne’e hodi fo konfiansa ba CNRT atu dezenvolve Timor-lesta ida diak liu

Enkuantu, CNRT mos apresia presensa ba observadores internasionais no observadores nasionais, media internasionais no nasional ne’ebe akompanha hela prossesu kampainha eleitoral tinan 2023

Journalista : John Marito