Konstrusaun Eskola Iha Lautém, Hetan Bensaun Tradisionál Husi Lia Na’in
SAPNewsTL, Lautem: Hafoin hala’o inaugurasaun ba eskola Ensino Pre-Escolar (EPE) Amahira no Ensino Básico Central (EBC) Luro hamutuk ho eskola sira seluk iha Lospalos iha 4 de Maiu 2023, Prezidente Projetu hamutuk ho dirijente eskola rua ne’ebe iha hodi hala’o serimonia agradesimentu no bensaun kultural ba eskola foun molok utiliza ba ensinu aprendizajen.
Tuir diskursu Direktor Ensino Básico Central Filipe Soares katak serimonia agradesimentu no bensaun kultural ne’e realiza atu halo agradesimentu ba natureza no maromak ba konstrusaun edifisiu eskola ne’ebe durante ne’e la’o ho di’ak no susesu atu bele uza ba aprendizajen ho seguru.
“Ohin ita mai iha ne’e la’os atu halo inaugurasaun maibé ita atu halo agradesimentu no bensaun kultural ba ita nia edifisiu eskola foun rua ne’e atu ita bele uza ba ensinu aprendijazen ho seguru no hakmatek”. Dehan Direktor Ensino Básico Central Filipe Soares iha nia diskursu, iha eskola EBC Luro, Sabadu, 29/07/2023
Iha fatin hanesan, Prezidente Projetu Komunitariu ba konstrusaun eskola Ensino Básico Central Luro Luis Pinto agradese ba Direktor Edukasaun Munisipiu Lautem tanba iha nia mandatu mak sira bele hetan
“Ha’u agradese ba director edukasaun munisipiu Lautem tanba iha nia mandatu mak Postu Luro hetan projetu komuniaria hamutuk hitu, nia esforsu mak ami bele hetan projetu ne’e nune’e ami agradese”. Teni Luis
Diretor Edukasaun Munisipiu Lautem Rui M.M. da Costa Branco mos agradese maske prezidente projetu sira la’os ho habilitasaun literaria enjineiru maibe sira bele kaer projetu no konsege lori to’o remata.
“Agradese ba Diretor Ensino Básico Central Sesante no Koordenadora Ensino Pre-Escolar (EPE) Amahira tanba mai husi latar belakang ne’ebe la’os enjineiru maibe bele kaer projetu hodi halo obra ne’e, konsege lori to’o nia finalidade”. Teni Diretor Edukasaun Munisipiu Lautem
Entretantu, konstrusaun edifisiu ba eskola EBC Luro ne’e ho unidade ida kompostu husi sala tolu (3) no edifisiu Ensino Pre-Escolar ne’e mos unidade ida kompostu husi sala rua,
Enkuantu, serimonia bensaun kultural ne’e halo husi Lia na’in Postu Luro no hetan partisipasaun husi Diretor Edukasaun Munisipiu Lautem ho nia ekipa no Administrador Postu Administrativu de Luro ho nia ekipa.
Jornalista: Luis Pailofo