Korrente Mota Sobu Uma, Estrada & Ponte Iha Covalima
SAPNewsTL, Covalima: Korrente Mota Boot Sobu Ponte Labarai Inklui Uma Ida tanba Kauza husi intensidade udan ne’ebé boot iha Munisípiu Covalima, nune’e ohin dader tuku sia rezulta korrente mota estraga ponte Labarai inklui komunidade nia uma no plantasaun sira.
“Udan komesa husi domingu loraik tuku haat loraik to’o agora la para, ohin dader Ha’u viajen husi Zumalai ba Suai to’o Labarai hare hahu husi tuku sia ne’e mota hahu sobu ponte sorin monu ona, maibe agora ponte ne’e kotu total maiz ou menus metru haat, nune’e movimentasaun entre ema no transporte tantu motorizada no kareta labele halo movimentu” Dehan Mateus Gonçalves ba SAPNews liu husi Via WhatsApp (04/07/2023)
Nia hatutan “Mota la’os sobu deit ponte maibe inklui uma ida besik ponte ne’e, bee mota hahu sobu uluk haris fatin inklui uma hela fatin, tuir ha’u nia hare uma na’in la konsege salva buat hotu maibe salva deit mak sira nia sasan sira iha uma laran inklui odamatan no janela”.
Nia “ husu ba parte Autoridade Protesaun Sivíl atu evakua no apoia emerjénsia ba vítima afetadus sira, nune’e sira bele hetan fatin provizóriu hodi hela bá”.
Sidadaun ne’e husu mos ba Ministériu Obras Públika atravez husi Institutu Jestaun Ekipamentus atu halo normalizasaun lalais ba Estrada refere nune’e movimentasaun diresaun Zumalai ho Suai bele la’o ho di’ak tanba ne’e dalan nasional.
Entretantu tuir nia jeralmente udan iha munisipiu covalima sei seidauk iha serteza atu para tanba dadaun ne’e kalohan kontinua nakukun no udan mos seidauk para ate agora.
Enkuantu, Tuir Intervista ho Ministru Obras Públicas Samuel Mendonça haktuir katak Nia parte Sei Orienta Instituto Gestão de Equipamentos (IGE) hodi halo normalizasaun ba Estrada no ponte ne’ebe aat iha Munisipiu Sira
Jornalista: Esmeralda da Silva