Kria Empregu 50.000 Ba Família Verdes, PVT Garante Sei Konkista Kadeira 8

SAPNewsTL, Dili : Partidu Os Verdes de Timor (PVT) hala’o mini kampanha iha Postu Administrativu Na’in Feto Munisipiu Dili, Iha Diskursu Presidente PVT Antonio Lela Huno da Cruz haktuir PVT hari’i husi ema kiak, kiik, mukit nia oan sira, PVT sei sai roman, matan, tilun no esperansa ba joven dezempregu sira

“Ita sei sai naroman, matan, tilun no esperansa ba joven dezempregu sira, ita hasoru dejafiu oioin, ita hari’i rasik ho ita nia kosar-ween, ita fiar ba jesus kristu katak ita sei manan, Os Verdes sei lori buras, matak no malirin ba joven Timor Leste, ita nia programa empregu ba joven sira”. Tenik Diskursu Presidente PVT Antonio Lela Huno da Cruz iha Kampu Futebol Taibesse, Dili, 24/04/2023

Presidente PVT ne’e hatutan, Partidu hanesan instrumentu politika hodi defende no kria kondisaun ba joven sira hamutuk 50.000 durante tinan

“Estadu ida ne’e la investe iha edukasaun hodi prepara joven sira, guvernu la preokupa joven sira nia problema, Dili sai sidade Estres (Trizte), joven sira estres, tanba ita servisu laiha, imi tenki fila ba uma hodi tetu no deside destinu nasaun nian ba futuru, Verdes sei hari’i 50.000 empregu ba jovens dezempregu sira”.haktuir Lela Huno

PVT promete sei loke sentru formasaun iha Munisipiu Aileu hodi prepara no forma joven sira liu husi utlizasaun osan subvensaun públika partidu nian

“PVT mai husi ema kiak, kiik no mukit nia oan sira, sira mak hamutuk hari’i Verdes, PVT fahe ona formuláriu 80.000 ba familia verdes sira, ita sei hetan kadeira ualu iha Parlamentu  Nasional hodi reforma lei sira no kria servisu ba joven sira liu husi uza osan subvensaun públika nian”.nia dehan

Entretantu, orseik Partidu Os Verdes hala’o Mini Kampanha iha Postu Administrativu Kristu Rei, portantu, ohin kontinua hala’o mini kampanha kampu futebol taibesse Postu Administrativu Nain Feto. enkuantu, Partidu refere sei kontinua nia kampanha iha Munispiu Ermera ho modelu dialogu

Jornalista : John Marito