Assalam Manan Coração 3-1 Iha Liga Timorense 2023

SAPNewsTL, Dili: Assalam FC manan Atletico Ultramar/Coração FC ho skore 3-1 iha jornada ikus divizaun dahuluk Liga Timorense epoka 2023 nune’e klube zigante ne’e hetan pontu tolu iha jogu ne’e.

Jogu Assalam FC kontra Atletico Ultramar/ Coração FC iha Estadium Munisipal Dili domingu (24/04/2023).

Jogu iha parte dahuluk bainhira kick off jogador husi ekipa rua halo jogu hodi muda bola ain ba ain hodi halo presaun no atake ba malu nune’e iha minutu 6 jogador Miguel Barbosa marka golu halo adversariu nia redi nakdoko muda kedas skore ba 1-0.

Skore refere halo ekipa rua sira nia jogu komesa manas tanba jogador sira husi Assalam FC responde golu no Atletico Ultramar/Coração FC hakarak aumenta golu hodi manan jogu nune’e tama minutu 29 Assalam FC konsege marka golu husi jogador estranjeiru Daniel Appiah muda skore impata 1-1 skore ne’e mantein to’o minutu 45 jogu parte dahuluk remata.

Tama ba jogu parte daruak jogador husi ekipa rua muda jogu tuir ida-idak nia estratejia nune’e ekipa rua halo presaun no atake makaas ba malu nune’e tama ba minutu 53 jogador Hasan Costa no minutu 57 jogador Lourenço Freitas husi Assalam FC marka golu halo redi adversariu nakdoko tan hodi muda skore ba 3-1.

Skore refere halo jogador husi Atletico Ultramar/Coração FC no Assalam FC hasa’e ritmu jogu hodi tenta atu marka tan golu maibe la konsege to’o minutu 90 remata skore mantein 3-1 hodi rezulta Assalam FC manan jogu no hetan pontu iha jornada ikus Liga Timorense epoka 2023.

Durante jogu ne’e Assalam FC halo substituisaun ba jogador nain lima no Atletico Ultramar/Coração FC troka jogador tolu, jogador Denilson dos Santos husi Atletico Ultramar/Coração FC ho Celcio Pereira husi Assalam FC hetan kartaun kinur.

Entretantu rezultadu husi jogu ne’e la rezulta klube rua ameansa ba zona degradasaun tanba ekipa rua ona iha okupa pozisaun seguru ona iha tabela klasifikasaun divizaun dahuluk Liga Timorense epoka 2023.

Depois jogu remata treinador Atletico Ultramar/ Coração FC Januario de Almeida dehan, jogador sira hatudu jogu diak no sira sei hadia faila sira jogador sira ohin halo iha kampu.

“Ohin hau nia ekipa hatudu joga diak maski derrota, hau nia jogador sira la iha ona presaun tanba ami nia pozisaun seguru ona iha tabela klasifikasaun no ami sei hadia faila sira ohin jogador sira halo iha kampu mak lina defeza la iha defende ladun diak no iha finalizasaun tanba iha oportunidade barak maibe la konsege aproveita diak para jogu tuir kontra Academica FC hetan rezultadu diak”, tenik Januario.

Iha okaziaun hanesan treinador Assalam FC Gaspar Amaral hatete, nia fo parabens ba jogador sira manan jogu hetan pontu tolu no kontente jogador esforsu tebes maski jogu ikus ona ba sira.

“Hau nia parabens ba jogador manan jogu hetan pontu tolu tanba antes joga hau sempre dehan ba hau nia jogador sira halo jogu intensaun mak manan ne’ebe hatudu jogu diak iha kampu ne’ebe hau kontente ohin sira esforsu tebes maski ohin jornada ikus ba ami”, Gaspar hateten

Reportajen: Augusto dos Santos