La Hatene Dalan ! Motor Soke Bus Baukau
SAPNewsTL, Dili : Ohin mais ou menuz tuku 16:02 loraik (20/03/2024), mosu asidente ida iha area Kaikoli, Kampus Sentral Universidade Nasionál Timor Lorosa’e (UNTL) rezulta motor soke bus diresaun Baukau tanba motorizada refere halai kontra sinais tránzitu.
Karreta bus ho xapa matríkula 37-355 ne’ebe halai husi diresaun Bekora ba Kolmera, iha dalan area kampus UNTL hetan soke husi motor ida ne’ebe joven mane ida lori hodi halai hasoru tanba motorizada refere halai kontra sinais tránzitu.
Joven Jovas Canossa da silva ne’ebe koduz motor ne’e haktuir, nia parte rekunhese lori motor halai kontra sinais tránzitu tanba nia la hatene katak diresaun ne’ebe nia hakat ne’e kontra sinais.
“Ha’u ho kolega atu ba kampus UNTL, ha’u halai kona diresaun ne’e tanba ha’u la hatene diresaun ida ne’e”, Tenik Motorista Jovas Canossa da Silva ba SAPNews iha lokal akontesimentu, Kaikoli Dili, 20/03/2024
Asidente ne’e rezulta motorista Jovas Canossa da Silva sofre kanek iha ain parte los tanba nia ain tama ba karreta okos, inklui foinsa’e feto ida ne’ebe nia tula husi Tasi-Tolu hodi ba kampus Sentral UNTL.
Hafoin asidente ne’e mosu, Parte Polísia Nasionál Timor Lorosa’e (PNTL) liu husi polísia tránzitu to’o kedas iha fatin akontesimentu hodi halo idetifikasaun ba kauza husi insidente ne’e.
Iha tempu hanesan, Parte seguransa mos halo kedas kontaktu ho ambulásia, nune’e ambulásia konsege tula sidadaun nain rua hodi ba halo tratamentu emergénsia iha Hospitál Nasionál Guido Valadares (HNGV) Bidau Dili.
Jornalista : Conzita Mota