La Tolera Aktu Krime, F-FDTL Husu Populasaun Labele Pániku
SAPNewsTL, Dili : Relasiona ho kazu ne’ebe Membru F-FDTL hetan atake husi individu balun iha area Bidau Akadiru-Hun horseik, Falintil Forsa Defeza de Timor-Leste, iha Tersa-Feira ne’e liu husi Konferénsia Imprensa Kapitaun Engenhária José António Nunes da Costa hateten Nasaun soberanu iha seguransa rua, iha ne’ebe atu bele kontrola estabilidade Nasional, Forsa rua ne’e iha nia regulamentu rasik hodi fo garantia ba seguransa populasaun nian.
“Buat hotu-hotu sei ba iha komando PNTL no F-FDTL mak sei Rezolve tuir regulamentu, situasaun ida ne’e labele paniku buat ne’ebe akontese dalaruma ita tama iha fatin ida akontese imediata depois buat ne’e paradu tuir prosesu investigasaun, ha’u labele fo sai katak antes ne’e nia tau tiha sivil ou tau farda mak ba halo asaun sira ne’e tanba agora dadaun prosesu sei la’o hela”. Dehan Kapitaun Engenharai ba Jornalista sira iha Quartel Geral Fatuhada Dili,Tersa-Feira (06/09/2022).
Kapitaun ne’e hatutan, Policia Militar (PM), F-FDTL no PNTL, ne’e seguransa Nasaun nian, ema hotu tenki respeitu, nia kontrola teritoriu Timor laran tomak 24 horas halo nia movimentu liuliu kontrola kona-ba estabilidade Nasional.
“Ita labele jeneraliza situasaun tomak tanba akontesementu ne’e iha asaun balu, ita nia F-FDTL, PNTL ne’ebe mak konstituisaun haruka no legal, hakarak ka lakohi tenki respeitu, ne’e dever populasaun hotu-hotu tantu se de’it tenki respeitu Forsa no Polisia, Forsa sei la tolera aktu krimi ne’ebe sei akontese no husu ba populasaun sira lalika paniku”. Tenik nia
Enkuantu, Kapitaun ne’e husu ba populasaun hotu tenki respeita forsa no polisia tanba uniku forsa ho polisia mak asegura, garantia estabilidade seguransa iha rai ne’e, portantu nia mos husu apoiu tomak husi populasaun hotu hodi bele hamutuk kontibui ba estabilidade.
Entretantu, daudaun ne’e Autoriedade Seguransa asegura ona individu balu ne’ebe deskonfia involve iha kazu ne’e no submete ona ba prosesu investigasaun
Jornalista : Justino Soriano
Editor : Luis Pailofo