Laiha Arte Marsial Ida Mak Eduka Buat Ladi’ak Ba Ema
SAPNewsTL, Dili : Deputadu Bankada Congresso Nacional de Reconstrução Timorense (CNRT) Patrocínio Fernandes apela ba juventude sira ne’ebé partisipa iha organizasaun arte-marsiais tenke kontribui ba rai doben Timor-Leste.
“Ha’u hanoin bankada CNRT ninia pozisaun ninia polítika ba estabilidade ba páz ne’e la iha rezerva tanba ita hakarak dezenvolve ita-nia rai, ita presiza estabilidade presiza páz, ita presiza ema hotu-hotu hadomi malu”, lia hirak ne’e hato’o ba jornalista sira iha nia knaar fatin, Tersa, 23/08/2022.
Nia dehan, liu-liu ba sira ne’ebé mak envolve iha arte-marsiais sira, joven barak liu partisipa iha organizasaun sira ne’e para forma sidadania di’ak liu tan ho mentalidade, depoiz bele kontribui ba nasaun ne’e, agora ne’e hanesan dezafiu boot ida ba estadu liu-liu governu hodi haree ne’e hanesan konsekuénsia ida bainhira loke buat ida hanesan nakloke boot
“Ita atu husu governu iha parte sira kompetente hanesan polísia no selu-seluk tan para atu bele tau atensaun máximu halo prevensaun para depoiz konflitu hanesan ne’e labele akontese mais liliu mós ita husu ba responsavél grupu arte-marsiais sira no responsavél ida-idak nian”. Dehan nia
Entretantu, Nia akresenta la iha arte-marsiais ida mak nia atu eduka buat ne’ebé la di’ak, maibé responsavél sira tenke hatene katak bainhira akomoda ema barak ona iha grupu ruma iha ne’eba, ne’ebé mai husi ema ho ninia karaktér oi-oin, tenke buka ezersísiu halo nusa para atu bele halo jestaun oinsá mak bele tama ema sira ne’e hotu ho karaktér oi-oin ne’e iha regras ida, iha dixiplina ida para labele hein katak 100%, pelu menus organizasaun sira ne’e kontribui ba estabilidade no Páz.
Ita mós apela ba membru sira iha grupu arte-marsiais sira hotu ne’ebé mak iha, sira tenke tau iha sira-nia konsiénsia katak ema seluk ne’ebé la involve iha grupu arte-marsiais sira ne’e iha direitu atu goza sira-nia liberdade, sira-nia hakmatek, ne’ebé sira-nia konflitu sira ne’e depoiz ema seluk sai vítima i ema seluk lakon sira-nia liberdade, ema seluk lakon sira-nia materiál, ne’e hanesan sidadaun, hanesan joven senti tristi mós ba situasaun sira ne’e, tanba ne’e mak objetivu tama iha organizasaun para atu bele eduka ita-nia an, forma ita-nia mentalidade nu’udar sidadaun di’ak ba ita-nia estadu.
Liu-liu hanoin uitoan, senti uitoan ita-nia inan-aman katuas ferik sira ne’ebé la envolve tama iha grupu sira ne’e, maibé sira tenke simu konsekuénsia ne’ebé todan hosi hahalok sira ne’ebé hanesan sira halo, ita la tau kulpa ba sira, tenke buka aprende hosi situasaun sira ne’e para depoiz sai hosi situasaun ne’ebé ita gosta tomak moris iha konflitus deit.
Jornalista : Eduardo Moniz
Editor : Ekipa Editorial