Laiha Dosente, Estudante Hanorin Malu Iha FAGRI-UNTL
SAPNewsTL, Dili : Estudante Departamentu Pescas e Ciência Marinha (DPCM), Fakuldade Agrikultura (FAGRI), Universidade Nasional Timor Lorosa’e (UNTL) liu husi komunikadu imprensa haktuir, Dosente Dr. Abilio da Fonseca, autoriza estudante ho estudante hanorin malu, fo ezame, fó prátika no até fo valór ba malu iha prosesu ensino aprendisajem.
Estudante Departamentu Pescas e Ciência Marinha konsidera estabelesimentu Departamentu Siénsia Marinha sai deit retórika tanba preparasaun rekursu umanu iha UNTL la tuir vizaun ne’ebe iha
“Ami estudante konsidera sei sai deit retórika tanba preparasaun rekursu umanu iha UNTL la tuir vizaun no objetivu ne’ebé iha hanesan rekursu dosente espesialidade iha area Peskas no siénsia mariña la iha”. Tenik Porta Voz Estudante UNTL Bendito dos Santos liu husi komunikadu imprensa iha Kampus Sentral UNTL, 20/10/1023
Bendito dos Santos hatutan, situasaun ne’e difikulta tebes estudante sira iha prosesu ensinu aprendisajem ba estudante sira ne’ebé sei ativu iha aula no difikulta estudante finalista sira atu orienta proposta monografia ba peskiza, semináriu rezultadu peskiza no defeza monografia
Por voz ne’e lamenta, Diretor Departamentu Pescas e Ciência Marinha Dr. Abilio da Fonseca fo espasu ba estudante hodi hanorin estudante, fo ezame, fo prátika no fo valor
“Iha Departamento Pescas e Ciência Marinha Dr. Abilio da Fonseca, autoriza estudante ho estudante hanorin malu, fo ezame, fó prátika no até fo valór ba malu iha prosesu ensino aprendisajem. Ami lamenta tebes tanba ida ne’e la garante kualidade iha ensinu apredizajem”.nia lamenta
Bendito dehan, bazeia ba faktu hirak ne’e, estudante lubun nia prestasaun, liu-liu notas ka valór ladi’ak no akademikamente notas iha implikasaun boot ba estudante sira mak ho idade nurak atu kontinua estudu ba mestradu no doutoramentu iha futuru
Lider Estudante Fakuldade Agrikultura UNTL ne’e aprofunda, iha departamentu mosu tratamentu la hanesan ba estudante sira, dezigualidade no la iha transparénsia iha prosesu hotu-hotu.
“Estudante maioria preokupa, no la konkorda ho tratamentu ne’ebé hala’o iha DPCM tanba estudante balun hetan tratamentu di’ak liu estudante sira seluk (Priviléjiu no sai Very Importent Person ka anak emas), espesífikamente liga ba oportunidade sira ne’ebé atu atribui ba estudante sira la iha transparénsia, justisa, la iha kompetisaun entre estudante sira, fó de’it ba estudante balun no dezvaloriza estudante sira ne’ebé mak esforsu maka’as ba estudu ho prestasaun notas di’ak.” Nia deklara
Estudante sira husu ba Magnífiku Reitor UNTL João Soares Martins no fundador sira husi Departamentu Pescas e Ciência Marinha iha tinan 2017 atu toma responsabilidade nu’udar inisiador departamentu hodi labele halo estudante sai vítima no halo rekrutamentu dosente espesialista foun iha area Pescas no Ciênsia Mariña, nune’e bele garante kualidade iha prosesu ensinu aprendizajem
“Ami husu ba Magnífiku Reitor atu hasai urgentemente despaixu ida hodi hapara imediatamente estudante ho estudante hanorin malu iha Pescas no Ciênsia Mariña tanba aktu ida ne’e fo prejuizu ba estudante sira iha prosesu ensinu no aprendizagem”. Nia husu
Iha fatin hanesan, Senadu Jeral UNTL Cristovão de Araújo hateten, wainhira la rezolve kazu refere ho imidiata mak estudante hotu sei tun ho espaduk hodi tama ba gabinete
“Wainhira Magnífiku Reitor ho estrutura tomak iha UNTL atu fo solusaun imediatu ba ezijensia hirak ne’e, karik laiha solusaun ba ami nia problema mak ami sei mobiliza estudante hotu hodi halo asaun hasoru estrutura departamentu no fakuldade inklui estrutura Universidade”. Tenik Senadu Geral UNTL Cristovão de Araújo
Entretantu, SAP News TL mos tenta hodi halo konfirmasaun ho estrutura topu universidade nian inklui Estrutura Fakuldade kona ba kazu ne’e, maibe parte relevante sira sei okupadu ho servisu seluk, nune’e Estrutura UNTL seidauk fo resposta ba kazu ne’e.
Jornalista : Ermelinda Soares