Laiha Igreja, Timor La Ukun An ! Lere Konsidera Moral Sarani Hahú Mihis
SAPNewsTL, Lautem: Hafoin missa enseramentu ba vizitasaun illas João Paulo II iha Parokia Kristu Liurai Lautem, iha diskursu Eis Jeneral F-FDTL Lere Anan Timur hateten Timor nia ukun mai husi povu FRETILIN, kultura no igreja katoliku nia dedikasaun no sakrifisiu.
Lere Anan Timur konsidera la iha igreja katolika, Timor La ukun an maibe ohin loron igreja katolika hasoru dezafiu bo’ot mak dekadensia moral.
Lere Anan Timur hateten ohin loron povu Timor iha nasaun soberanu independente, liu husi povu FRETILIN, kultura tradisaun no igreja katolika no keta haluha katak povu Timor maioria pursentu sia nulu katoliku no povu Timor nu’udar funu na’in, katolika sai forsa prinsipal mak ohin Timor bele hetan ukun rasik an maibe ohin loron mos igreja katolika hasoru dezafius
“Ohin loron ita nasaun soberanu, independente, ukun an ona, povu Timor nu’udar na’in, katolika nu’udar forsa prinsipal mak ohin ita bele ukun an maibe ita iha dezafius, nu’udar sarani katoliku, dezafius ba igreja katolika,dezafius presiza resposta ida, se dezafius laiha resposta maka dezafius sei mai beibeik, ita nia igreja katolika, ita sarani iha problemas, problemas tenke hetan solusaun se ita la hetan solusaun mos ita bele lakon”. Dehan Lere Anan Timur iha igreja Kristu Liurai Lautem, 10/10/2023
Lere hatutan ohin loron iha relijiaun barak mak eziste ne’e sai dezafiu bo’ot ba sarani katolika ne’ebe nu’udar fiar na’in hodi firme iha nia pozisaun hanesan sarani atu labele monu ba ema oportunismu sira ne’ebe hanesan diabu ida atu lori ema ba tuir dalan seluk.
“Nu’udar sarani katoliku, igreja katolika la iha ita mos la ukun an, ne’e dezafiu bo’ot ba ita sarani sira, dezafiu bo’ot ba igreja katolika, ba Amo Bispo nain tolu, ba Padre no Madre sira, ita nu’udar sarani ita tenke firme iha ita nia pozisaun, ema oportunismu ne’e mos inimigu bo’ot ida, diabu bo’ot ida ne’ebe lori ita ba dalan seluk“. Lere defende
Lere hatutan sarani sira komesa hasoru dezafiu bo’ot fiar hahú menus no moral hahú mihis nune’e husu ba relijiozu sira atu oinsa bele hasa’e fali moral sarani nian
“Dezafiu seluk katak ita nu’udar katoliku nu’udar sarani ita nia dekadensia moral, ita nu’udar sarani ita nu’udar sarani ita nia moral komesa mihis ba daudaun, dekadensia moral sai dezafiu bo’ot ba ita sarani sira liliu ba Padre no Madre sira halo oinsa atu bele hasae fila fali moral atu bele identifika an nu’udar sarani nu’udar povu nu’udar nasaun”.
“Ita dehan katak primeira estafeta ne’ebe lori dokumentus komanda luta ba rai liur ne’e igreja katolika inklui politika unidade nasional ne’e mai husi igreja katolika”. Nia konta
Lere mos husu atu hatutan historia sira ne’e ba oan sira atu sira bele hatene nune’e bele habo’ot nafatin sira nia fiar katoliku no hasa’e nafatin sira nia moral nu’udar sarani nu’udar mos sidadaun ida iha nasaun ida
“Oan sira ne’e la hatene historia, tenke konta historia ne’e ba sira para sira nia fiar labele mihis, ba sarani sira liliu relijiaun ponta leste ninian atu hametin imi nia fiar nu’udar sarani hasa’e imi nia moral nu’udar sidadaun nu’udar mos funu nain tanba ohin loron era teknolojia telemovel halo ita nia liña komunikasaun mihis ba dadaun”. Nia hameno
Jornalista: Luis Pailofo