Lansa Feira 28 Novembru, V-MAE : Partilla Moris Ho Unidade
Imajen Lansamentu Feira 28 Novembru iha Munisipiu Manatutu, 23/11/222
SAPNewsTL, (MANATUTU) : Partisipante hamutuk 112 mak partisipa iha atividade feira ne’ebé organiza husi Ministériu Turizmu, Komérsiu no Indústria, iha Munisípiu Manatuto, hodi komemora loron proklamasaun independénsia unilaterál 28 Novembru bá dala-47.
iha abertura, Vise-Ministru Administrasaun Estatal (MAE), Lino de Jesus Torrezão hateten, programa ne’ebé integradu iha Komemorasaun Loron Proklamasaun independensia, ho intensaun atu partilla moris no unidade entre Timoroan sira no hakbiit ekonomia família.
“Feira reprezenta, partilla ita-nia moris hamutuk, ita-nia unidade no kumiñiaun, tanba ne’e mak iha feira ne’e, ita labele buka hetan lúkru de’it, maibé, liuliu atu hatene no mós rekoñese ita-nia lisan hanesan ema Timoroan, ita faan ho folin baratu no ema seluk sosa ho laran kontente,” dehan Vise MAE, Lino de Jesus, bainhira loke atividade feira ne’ebé hala’o iha suku Aiteas Postu Administrativu Manatutu Villa.
Governante ne’e hatutan, atividade feira ne’e nu’udar sorteiu no fó supreza bá ema seluk.
“Feira tenki-ser hatene nakonu ho espíritu kumiñiaun hanesan lisan Timor nian atu sai nan ho feton, fó liman ba maluk hodi simu loron boot proklamasaun unilaterál nian,” afirma nia.
Lino de Jesus lori governu sentrál nia naran, agradese liña Ministériu hot-hotu ne’ebé partisipa iha feira refere, tanba ezekutivu sempre buka meius hotu atu aumenta rendimentu negosiante sira.
Sorin seluk, Koordenadór Jerál Feira 28 Novembru 2022, Jelino Soares hateten, objetivu husi atividade feira ne’e mak atu fó oportunidade bá grupu, indivídu atu promove no fan sira-nia produtu inklui instituisaun estadu sira mós bele promove sira-nia atividade servisu ne’ebé durante implementa ona.
“Fó oportunidade bá kada instituisaun governu nian hodi ptomove lala’ok no atividades sira ne’ebé implementa husi instituisaun sira. Fó mós oportunidade bá indivídu, artezenatu no komersiante hahán no bebidas hodi promove, nune’e mós fan produtu bá vizitante sira hodi bele hetan rendimentu ruma,” dehan Jelino.
Partisipa feira ne’e kompostu husi non-komersiál ne’ebé mak husi instituisaun governu no parseiru sira hamutuk 28, komersiál iha artezenatu hamutuk 36, hahán inklui bebidas hamutuk 48, nune’e komersiál no non-komersiál totál 112 mak promove no faan sira-nia produtu iha atividade feira refere.
Entretantu, partisipa iha abertura bá feira ne’e, Vise-Ministra Turizmu Komunitária no Kultura, Inácia Conceição Teixeira, Sekretáriu Estadu Komunikasaun Sosiál, Merício Akara, reprezentante Prezidénsia Repúblika, autoridade lokál, komunidade no entidade seluk tan.
Hafoin loke feira refere, governante sira hamutuk ho konvidadu sira hala’o vizita bá kada tenda ne’ebé mak halo espozisaun ba sira-nia produtu no seluk tan.
Atividade feira ne’e, hahú iha loron 23 to’o loron 27 fulan Novembru 2022, hodi komemora loron proklamasaun independénsia unilaterál 28 Novembru ba dala 47 iha Munisípiu Manatutu.
Jornalista : Vinsensius saldanha Morais De Araujo