Limita Jornalista Asesu HNGV ! AJTL Konsidera MS Tenta Taka Problema Saúde
SAPNewsTL, DILI- Relasiona ho karta sirkular ne’ebe fo sai husi Hospital Nasional Guido Valadares (HNGV) ne’ebe limita media ka jornalista sira hodi halo kobertura iha HNGV. Assosiasaun Jornalista Timor-Leste(Sigla AJTL), liu husi komferensia imprensa konsidera Ministériu Saúde tenta taka informasaun problema saúde iha HNGV ba públiku hodi asesu.
Presidente AJTL Jevonia Vieira hateten midia ka jornalista hola papel importante iha pais sira demokrasia, liu-liu oinsa atu asegura ninia sidadaun sira hodi hetan informasaun lolos no kredivel liga ho serbisu publiku nian. Iha era digital dadauk ne’e, media ka jornalista la’os deit transmite informasaun, maibe hala’o mos funsaun kontrolu sosial liu husi ninia reportajen investivagativu sira.
Lider AJTL ne’e akresenta, jornalista halo kobertura iha espasu publiku sira hanesan ospital, eskola, aeroportu, palasiu no edifisiu públiku sira seluk iha pais ne’e kona-ba asuntu sira liga serbisu administrasaun publiku nian sein impedimentu tanba jornalista hala’o mos ninia mandatu konstitusional RDTL nu’udar hatur iha artigu 40⁰ no 41⁰ atu garante no hakonu sidadaun hotu ninia direitu atu asesu informasaun.
“Assosiasaun jornalista Timor-Leste durante ne’e halo advokasia hodi promove no hametin liberdade imprensa no liberdade espresaun, ami hare katak Karta sirkular husi Deritora Ezekutiva hospital nasional guido valadares (HNGV), Sra.Cecilia Baros hodi Bandu midia ka jornalista Sira halo kobertura iha HNGV ne’e nu’udar tentativa no ameasa ida ba liberdade imprensa no liberdade espresaun”. Dehan Porta voz Presidente AJTL, Maria Jevonia Fernandes Vieira ba jornalista sira iha,sede AJTL Tersa-feira(02/04/2024).
Presidente AJTL esplika katak diretora ezekutivu HNGV tenki konsiente katak, hospital nasional ne’e espasu públiku, laos espasu privadu kargu xefia ka governante ruma nian, nune’e bandu sidadaun ka jornalista sira atu asesu informasaun liga serbisu publiku nian. Bainhira ema halo video ka foto hodi manipula ba publiku buka meius hodi kontra laos bandu midia ka jornalista sira hodi halo kobertura.
“AJTL kontra no kondena makaas karta sirkular husi Diretora Ezekutiva HNGV ne’ebe dirije ba publiku, midia ka jornalista sira iha kontestu kobertura no liberdade espresaun tanba sirkular ida ne’e la tane prinsipiu boa governasaun”. Nia kontra
AJTL konsidera karta sirkular refere ho intensaun atu taka informasaun sira kona ba prosesu tratamentu saude, falta aimoruk no falta medikamentu sira seluk ne’ebe dadauk ne’e akontese iha HNGV tanba inkapasidade ministériu saude nian.
Porta voz ne’e husu ba diretora ezekutiva HNGV atu dada fila karta sirkular hodi fo espasu no biban ba midia ka jornalista sira atu halo kobertura iha HNGV nu’udar espasu publiku atu asegura publiku nia direitu ba Informasaun los no kredivel.
Enkuantu, AJTL husu ba provedoria dos direitus humanos e justisa (PDHJ) atu foti medida hasoru karta sirkular refere tanba impede ona midia ka jornalista nia serbisu hodi garante boa governasaun no publiku nian direitu ba informasaun.
“Ami husu ba PDHJ no Sekretaria Estadu Komunikasaun Sosial (SEKOMS) atu fo hanoin ba governante sira ka kargu xefia sira instituisaun estadu nian atu fo informasaun ba jornalista sira liga serbisu públiku nian”. Nia husu
Hafoin notisia ne’e tun SAPNews seidauk halo komfirmasaun ho parte ministériu saúde kona ba karta refere, inklui pozisaun SEKOMS no PDHJ kona ba preokupasaun refere.
Jornalista : Eleonora Fátima