Lori Jogador Estranjeiru Nain-3 ! Kantada Garante Manan Nature 5-0
Imajem : Treinador AS Kantada Jose Fernandito hala’o konferensia imprensa iha Estadium Munisipal Díli sesta, (17/05/2024).
SAPNewsTL, Dili – AS Kantada garante manan Nature FC ho skore 5-0 ba jogu aban iha Kopa FFTL 2024 tanba sira sei lori jogador estranjeiru nain tolu ho jogador rejistadu iha Liga Timorense.
“Ha’u garante ami sei manan FC Nature ho skore 5-0 ba jogu aban iha Kopa FFTL 2024, ami nia klube sei reforsa husi jogador estranjeiru nain tolu ho jogador rejistadu iha liga no jogador seidauk partisipa liga, tan ne’e ba jogador sira ne’e fiar katak sei halo buat diak iha kampu durante minutu 90 hasoru FC Nature”, dehan treinador AS Kantada Jose Fernandito ba jornalista sira liu husi konferensia imprensa iha Estadium Munisipal Díli sesta, (17/05/2024).
Treinador hatutan, ami husi AS Kantada durante halo preparasaun kuaje la’o fulan tolu ona, nune’e masimu ona, sira prontu para hasoru FC Nature ba jogu aban nian.
Jose informa tan, jogador sira ne’e hanesan deit bazeia ba preparasaun deit ida ne’ebe mak preparasaun diak sei halo buat diak iha kampu maibe jogu minutu 90 mak sei determina rezultadu.
Iha fatin hanesan treinador FC Nature Emilio G. de Oliveira hatete, sira nia klube preparadu kontra AS Kantada ba jogu aban nian.
“Ami husi FC Nature preparadu kontra AS Kantada ba jogu aban iha Kopa FFTL 2024, nune’e ba jogu aban ami tenki manan para lidera provizoriu pool A tanba antes ekipa rua iha pool joga empata 1-1”, tenik Emilio
Emilio salienta tan, sira lori jogador lokal deit ne’ebe seidauk joga iha Liga Timorense tanba hakarak promove jogador lokal sira seluk, klube AS Kantada ne’e ameansadu ba sira tanba sei reforsa husi jogador sira rejistadu iha liga ho jogador estranjeiru nain tolu nune’e sira sei tau atensaun ba ida ne’e.
AS Kantada ho FC Nature ne’e hamutuk ho Relay Laleia no DIT FC iha pool A.
Reportajen: Augusto dos Santos