Loron 28 Setembru 2023, Manny Pacquião Mai TL
SAPNewsTL, Dili: Boxista legendáriu Manny Pacquião husi Filipina sei mai vizita Timor-Leste (TL) iha loron 28 fulan setembru 2023 tanba hakarak fo motivasaun ba boxista iha Timor-Leste.
“Ita nia bainaka espesial boxista Manny Pacquião mai Timor-Leste ho intensaun atu motiva boxista Timoroan sira hotu, nune’e bele hetan prestasaun hanesan boxista lejendariu ne’e”.
“Iha orariu durante loron tolu tanba boxista lejendariu ne’e sei mai iha loron 28 fulan setembru no sei fila fali iha loron 30 fulan setembru 2023”, dehan Xefi komisaun organizador João Rodrigues ba jornalista sira liu konferensia imprensa iha edifisiu MJDAC Lecidere, Dili segunda (25/09/2023).
Xefi hatutan, Manny Pacquião mai Timor-Leste durante loron tolu ne’e komisaun nasional servisu hamutuk ho parte Ministériu Negosiu Estranjeiru no Kooperativa (MNEC sigla portuges), parte seguransa ho Polisia Nasional Timor-Leste (PNTL), Federasaun Boxe Amadora Timor-Leste (FBATL) no instituisaun sira seluk ligadu ba vizita boxista lejendariu ne’e mai Timor-Leste.
João informa, Iha loron 28 fulan setembru 2023 Manny Pacquião sei to’o Airoportu Internasional Nicolau Lobato iha oras 12:20 meiudia ho aviaun Citilink, iha parte loraik Manny Pacquião sei ba vizita nia maluk sira husi Filipina iha Timor-Leste liuliu embaixada Filipina iha Timor-Leste.
Iha loron 29 fulan setembru 2023 Manny Pacquião sei ba hasoru Prezidente da Repúblika Jose Manuel Ramos Horta iha palasaiu prezidente iha oras 08:30 dader, ba hasoru Primeiru Ministru Jose Alexandre Kayrala Xanana Gusmão iha palasaiu governu iha oras 09:00 dader.
Nia afrima tan, sesaun loraik Manny Pacquião sei vizita klube boxing sira iha Timor-Leste iha oras 03:00 loraik mak hanesan klube Benfica Boxing Club, EL Matador Boxing Club, Oriental Boxing Club no ikus ba Dili boxing Club, no iha Dili Boxing Club nia fatin mak atleta sira husi klube haat sei halo jogu ezibisaun
Iha parte kalan mak MJDAC sei han kalan hamutuk ho Manny Pacquião ho nia delegasaun mai Timor-Leste, iha loron 30 fulan setembru 2023 boxista lejendariu ne’e sei hasoru ministru juventude desportu arte kultura Nelyo Isaac Sarmento iha salaun MJDAC iha oras 08:30 no orsamentu MJDAC prepara ba vizita boxista lejendariu Manny Pacquião mai Timor-Leste ho montante 26,000 USD.
Reportajen: Augusto dos Santos