Manan Emmanuel 3-1, Ponta Leste Konkista Vitoria Dahuluk Iha Liga Timorense 2023

SAPNewsTL, Dili: AS Ponta Leste konskita vitoria dahuluk iha Liga Timorense epoka 2023 hafoin manan Emmanuel FC ho skore 3-1 no hetan pontu tolu iha jornada dahaat hodi sai zona degradasaun tanba antes jogu sira okupa pozisaun ikus liu iha tabela klasifikasaun.

Jogu AS Ponta Leste kontra Emmanuel FC hala’o iha Estadium Munisipal Dili tersa 21/03/2023.

Iha jogu parte dahuluk bainhira kick off jogador husi ekipa rua halo joga pasa bola ain ba ain hodi halo presaun no atake ba malu ne’ebe tama minutu 21 jogador Luis Ribeiro husi AS Ponta marka golu halo Emmanuel FC nia redi nakdoko hodi hatuur kedas skore ba 1-0.

Skore refere halo ekipa rua aumenta ritmu jogu nian hodi hetan oportunidade barak ameansa baliza kada ekipa nian maibe jogador sira husi ekipa rua la aumenta tan golu to’o minutu 45 jogu parte dahuluk remata skore nafatin 1-0.

Kontinua ba jogu parte daruak ekipa rua muda estratejia jogu nian ne’ebe jogador husi Emmanuel FC halo presaun makaas ba adversariu para atu marka golu hodi halo impata maibe la konsege, iha minutu 64 Emmanuel FC tenki sofre tan golu husi jogador Ricardo Bianco hodi muda fali skore 2-0.

Skore 2-0, jogador sira husi Emmanuel FC tenta nafatin buka oportunidade atu marka golu liu husi halo presaun makaas ba ekipa adversariu ne’ebe tama ba minutu 73 jogador Jaimito Soares marka tan golu ba redi adversariu hodi muda fali tan skore ba 3-0 liu husi oportunidade kontra atake ba adversariu Emmanuel FC.

Sofre golu tolu ona halo jogador Emmanuel FC halo presaun makaas liu tan ba ekipa adversariu As Ponta Leste hodi marka golu para hamenus skore ne’ebe tama iha minutu 75 jogador Angelito Tilman husi Emmanuel FC konsege marka golu hodi halo redi AS Ponta Leste nakdoko hamenus skore ba 1-3.

Iha minutu 25 ikus nian jogador sira husi ekipa rua la aumenta tan golu ona maski sira iha oportunidade ameansa baliza kada ekipa maibe la konsege tanba baliza rua husi ekipa asegura nia redi ne’ebe to’o minutu 90 remata skore nafatin 3-1 hodi rezulta AS Ponta Leste konkista vitoria dahuluk iha Liga Timorense epoka 2023 no hetan pontu tolu hodi muda nia pozisaun iha tabela klasifikasaun tanba antes ne’e AS Ponta Leste okupa pozisaun ikus nian.

Depois jogu remata treinador AS Ponta Leste Edi Fernandes dehan, nia fo agradese ba jogador sira tanba esforsu duni nune’e sira hetan pontu tolu liu husi marka golu tolu ba adversariu 

“Hau fo agradese ba hau nia jogador sira tanba objetivu husi jogu ne’e ami mai hanoin ne’ebe okupa zona degradasaun ami tenki esforsu para sai husi zona ne’e entaun ohin ami nia jogador sira esforsu duni nune’e ami hetan duni pontu tolu liu husi marka golu tolu ba Emmanuel FC”, tenik Edi

Edi hatutan, ba jogu tuir sira nafatin hadia sira nia jogador husi lina defeza, mediu no avansadu nian tanba ohin iha minutu balun jogador sira husi lina halo sala.

Iha sorin seluk asistente treinador Emmanuel FC Van Basten hatete, sira derrota tanba faila husi guarda redi oferese golu rua ba adversariu no jogador sira halo jogu ladun tuir instrusaun husi treinador sira.

“Ohin rezultadu ami derrota 3-1, faila husi ami nia guarda redi oferese golu rua ba AS Ponta Leste entaun ami susar para duni golu sofre ne’e, tekniku jogu nian ami fo ba jogador sira la sala maibe jogador sira mak ladun tuir instrusaun ami fo maibe failansu mak baliza tanba bola ida kona nia mak golu no ida nia kaer fo fali ba jogador adversariu marka golu”,

Van Baste akresenta tan, objetivu ba liga tinan ida ne’e hakarak nafatin iha divizaun dahuluk ho derrota ida ne’e sira nafatin okupa pozisaun dahaat iha tabela klasifikasaun liga nian maibe ba jogu tuir mai sira sei hadia diak liu tan faila sira iha jogu ohin ne’e hodi hasoru fali Academica FC.

Entretantu iha jogu minutu 90 ohin ne’e AS Ponta Leste halo substituisaun ba jogador nain lima no Emmanuel FC mos troka jogador nain lima, jogador Luis Ribeiro, Expedito da Conceicão ho Almerito da Silva husi AS Ponta Leste hetan kartaun kinur no jogador Edit Savio husi Emmanuel FC hetan mos kartaun kinur, rezultadu 3-1 lori AS Ponta Leste sai husi zona degradasaun hakat ba pozisaun dahitu ho pontu 4 iha tabela klasifikasaun husi jogu manan ida, impata ida no lakon rua no Emmanuel FC nafatin okupa pozisaun dahaat ho pontu 6 iha tabela klasifikasaun divizaun daruak Liga Timorense epoka 2023 husi jogu manan rua no lakon dala tolu.

Reportajen: Augusto dos Santos