Manny Pacquião Hakarak Suporta Modalidade Boxing Iha TL
SAPNewsTL, Dili: Boxista Lejendáriu husi Filipina Manny Pacquião hasoru Ministru Juventude Desportu Arte Kultura sigla portuges (MJDAC ) Nelyo Isaac Sarmento katak hakarak suporta modalidade desportu iha Timor-Leste liuliu boxing iha futuru tanba Timor-Leste potensial tebes.
“Ha’u fo obrigadu ho apresia ba Presidente Repúblika no Governu liu husi Primeiru Ministru ho Ministru Juventude Desportu Arte Kultura ho Timoroan hotu bele akomoda ami mai Timor-Leste,”
“Ha’u iha esperansa katak ida ne’e laos ba ikus mai Timor-Leste maibe ida ne’e ba vizita dahuluk mai hau, hau koko atu mai fila fali tanba hau hare’e Timor-Leste potensial tebes atu nune’e hau bele loke negosiu ho akademia boxing iha Timor-Leste no suporta federasaun desportiva liuliu boxing”, dehan boxista lejendariu Manny Pacquião ba jornalista sira liu husi diskursu iha salaun MJDAC Lecidere, Dili sabadu (30/09/2023).
Manny Pacquião hatutan, nia sujere ba governu kria (show boxing Fighting) atividade boxing barak tanba iha Filipina sira mos kria atividade boxing, sira bolu “Sunday boxing” atu nune’e ema bele partisipa hotu inklui boxista joven potensial sira,
Manny Pacquião mos hakarak los suporta desportu iha Timor-Leste hanesan futebol, basketebol espesial boxing atu nune’e nia mos bele fahe nia talentu espesial iha boxing no desportu sira seluk.
Iha fatin hanesan, Ministru Juventude Desportu Arte Kultura (MJDAK) Nelyo Isaac hatete, ohin Manny Pacquião fila fali ba Filipina nia lori governu nia naran agradese ba Manny Pacquião nia prezensa iha Timor-Leste tanba vizita ida ne’e importante ba Timor-Leste laos deit atu mai vizita hare’e Timor-Leste maibe atu fortifika relasaun hodi motiva boxista sira iha Timor-Leste
Esperansa boot katak Manny Pacquião fila keta haluha Timor-Leste hein katak Manny Pacquião bele mai vizita tan Timor-Leste no Manny Pacquião nia prezensa bele loke tan oinsa Timor-Leste bele hetan tan relasaun ho boxista sira iha rai seluk tan
“Ohin ita boot fila fali ba Filipina, ha’u lori governu nia naran agradese ba ita boot nia prezensa iha Timor-Leste tanba vizita ida ne’e importante ba ami laos deit atu mai vizita atu hare’e Timor-Leste, maibé atu fortifika ita nia relasaun hodi motiva ami nia boxista sira, karik ita boot fila keta haluha Timor-Leste hein katak ita boot bele mai vizita Timor-Leste no ho ita boot nia prezensa bele loke tan oinsa ami bele hetan relasaun ho boxista sira iha rai seluk”, tenik Nelyo
Entretantu, Manny Pacquião nia prezensa iha Timor-Leste durante loron tolu husi loron 28 fulan setembru to’o loron 30 fulan setembru 2023.
Nia hasoru Presidente Repúblika Jose Manuel Ramos Horta, Primeiru Ministru José Alexandre Kayrala Xanana Gusmão, hetan intervista direita ho RTTL,EP ho Ajensia Tatoli, vizita klube boxing hanesan Dili Benfica Boxing Club, Oriental Boxing Club, EL Matador Boxing Club no Dili Boxing Club no ikus hasoru malu ho Ministru Juventude Desportu Arte Kultura Nelyo Isaac Sarmento.
Reportajen: Augusto dos Santos