Manny Pacquião To’o Ona Iha Timor-Leste
SAPNewsTL, Dili: Boxista lejendariu husi Filipina Manny Pacquião to’o ona Timor-Leste ho aviaun Citilink tun iha Airoportu Internasional Nicolau Lobato iha oras 12:06.
Observasaun jornalista SAPNewsTL iha terenu bainhira boxista lejendariu Manny Pacquião tun husi Aviaun Citilink iha oras 12:06 komisaun organizador husi MJDAC hamutuk ho parte seguransa husi PNTL, entidade sira husi governu, Prezidente CDTL Macario F. Sanches no Primeiru Ministru Jose Alexandre Kayrala Xanana Gusmão nia oan mane Kayolo simu kedas Manny Pacquião no Kayolo tara tais ba boxista lejendariu tuir kultura Timor-Leste despois Manny Pacquião ho nia ekipa tama kedas ba fatin VIP Airoportu Internasional Nicolau Lobato nian.
Depois Manny Pacquião simu tais direitamente tama ba fatin VIP Airoportu Internasional Nicolau Lobato nian, komisaun organizador husi MJDAC labele fo fatin ona ba jornalista sira inklui jornalista SAPNEWSTL atu asesu ba fatin refere, hafoin liu minutu 15 Manny Pacquião sai husi fatin VIP Airoportu Internasional Nicolau Lobato ba direitamente fatin deskansa nian iha Otel Timor Plaza.
Orariu vizita Manny Pacquião nian iha Timor-Leste xefi komisaun organizador João Rodrigues fo sai ona liu husi konferensia imprensa katak ohin Manny Pacquião sei to’o Airoportu Internasional Nicolau Lobato iha oras meudia ho aviaun Citilink,.
iha parte loraik Manny Pacquião sei ba vizita nia maluk sira husi Filipina iha Timor-Leste liuliu embaixada Filipina iha Timor-Leste, Aban Manny Pacquião sei ba hasoru Prezidente da Repúblika Jose Manuel Ramos Horta iha palasaiu prezidente iha oras 08:30 dader, ba hasoru Primeiru Ministru Jose Alexandre Kayrala Xanana Gusmão iha palasaiu governu iha oras 09:00 dader.
Nia afrima tan, sesaun loraik Manny Pacquião sei vizita klube boxing sira iha Timor-Leste iha oras 03:00 loraik mak hanesan klube Benfica Boxing Club, EL Matador Boxing Club, Oriental Boxing Club no ikus ba Dili boxing Club.
Iha Dili Boxing Club nia fatin mak atleta sira husi klube haat sei halo jogu ezibisaun depois iha parte kalan mak MJDAC sei han kalan hamutuk ho Manny Pacquião ho nia delegasaun mai Timor-Leste.
Iha loron 30 fulan setembru 2023 boxista lejendariu ne’e sei hasoru ministru juventude desportu arte kultura Nelyo Isaac Sarmento iha salaun MJDAC iha oras 08:30 no orsamentu MJDAC prepara ba vizita boxista lejendariu Manny Pacquião mai Timor-Leste ho montante 26,000 USD.
Reportajen: Augusto dos Santos