Maria Preokupa Labarik Barak Kontinua Sofre Moras & Hamlaha
SAPNewTL, Dili : Iha ambitu selebrasaun loron mundial ba labarik, Reprezentante Labarik Timor-Leste Maria Eliza hateten, labarik hotu iha direitu hanesan atu hetan ambiente ne’ebe seguru no saudavel, ema hotu hotu presiza proteze labarik sira husi hamlaha no moras iha Timor Leste
Maria Eliza haktuir, labarik barak mak oras ne’e daudaun sofre hela impaktu husi mudansa klimatika, nune’e Governu Timor Leste ratifika tiha konvensaun direitu labarik nian iha tinan 2003 no iha konstituisaun RDTL artigu 18⁰ fo biban no garante atu proteze labarik sira hotu.
“Tan ne’e, ami nu’udar labarik komprende katak lider ne’ebe ho kompetensia aas, Sira mak iha responsablidade no foti desizaun positivu hodi forma labarik sira nia futuru ne’ebe mais prosperu iha ita nia Nasaun.” dehan Maria Eliza Reprezentante Labarik ba Jornalista iha Palasiu Prezidenti Aitarak laran Dili, segunda 20/11/2023
Reprezenta labarik Feto Timor-Leste ne’e husu ba Autoriedade Kompetente sira hodi prioritiza politika ne’ebe bele promove ambiente sustentavel ba nasaun Timor-Leste.
“Ami rekomenda ba autoridade kompotentes no lider sira ne’ebe iha kompetensia masimu atu fo preoridade ba politika sira ne’ebe be bele promove no mos apoiu ambiente ida ne’ebe mais sustentavel ba nasaun nia futuru” Nia hateten.
“Fo oportunidade no espasu ba labarik sira bele kria sira nia futuru ne’ebe mais sustentavel no mais reziliente ba gerasaun sira tuir mai tanba labarik mak roman no kuluna vertebral ba estadu demokratiku ida ne’e” Nia tenik
Foinsa’e Feto ne’e mos husu ba lider sira hodi promove programa sira kona ba mitigasaun mudansa klimatika ba eskola sira no komunidade iha area rural.
“Mudansa klimatika nu’udar asuntu global ida ne’ebe ita hotu hotu presiza toma atensaun ho seriu, ita persiza halo kolaborasaun global liu husi advokasia sira no mos halo kooperasaun internasional hodi responde ba kauza prinsipais husi mudansa klimatika”. Nia Sublinha
Enkuantu, Tuir dadus ne’ebe SAPNewsTL rekolla nota katak Labarik barak ho persentajem 48 sofre malnutrisaun iha Timor-Leste tanba kauza husi hahan sira inklui familia ne’ebe hetan rendimentu kiik husi loron ba loron.
Jornalista : Genoveva Sarmento