Menuz Fasilidade & Pessoal Saúde, Soibada Rejista Moras ISPA 37
SAPNewsTL, Manatutu : Durante Fulan Agostu tinan ne’e Sentru Saúde Soibada Rejistu moras Infesaun Respiratóriu Aguda (ISPA sigla portugés) hamutuk 37 iha sentru saúde Soibada, Postu Administrativu Soibada Munisípiu Manatutu.
Kazu moras ne’ebé ho númeru as liu ne’ebé rejista iha sentru saúde ida ne’e maka pasiente ho moras inspesaun Respiratoriu Aguda (ISPA) ne’ebé mak durante ne’e pessoal saude sira rejistu númeru as liu moras sira seluk iha sentru saúde, Soibada inklui moras katar maibé depende ba situasaun.
“Kada loron iha segunda to’o sesta ita nia atendementu ba pasiente sira ativu hahu husi tuku 08:00 to’o meiudia, ita deskansa no kontinua fali iha tuku 14:00 to’o tuku 17:00 loraik Otl, maibé ita la taka dalan bainhira iha pasiente balun mai ho emerjensia, portantu iha loron feriadu pessoal saude sira firme hodi halo atendimentu ba pasiente sira ne’ebé moras” Dehan Sefi Sentru Saúde Soibada, Simplicio de Jesus Alves ba SAPnews iha knaar fatin, Segundu (11/09/2023).
Dirizente sentru saúde ne’e akresenta, maioria númeru pasiente ne’ebé ho kondisaun moras ISPA maka númeru boot kompara ho moras sira seluk
Tuir dados ne’ebé pessoal saúde sira rejistu, labarik ho idade tinan tolu (3) to’o tinan 14 no idade adultu tinan 14 to’o 30 mak afeta ba moras kronika ne’e durante fulan Agostu nia laran, maibé, liu husi esforsu mediku sira nian konsege rekopera, hare ba gravidade kada pessoa, tamba dala ruma iha Timor-Leste (TL) komunidade barak hetan moras grave mak foin mai halo tratamentu entaun atu rekopera presiza tempu ba atendementu, nia hatutan.
“Sentru saúde Soibada Ita iha enfermeiru parteira no médiku voluntariu, karik ita hetan kazu balun ne’ebé gravidade tebes pessoal saude halo observasaun, maibé laiha mudansa ba pasiente nia moras, ita komunika ho família pasiente hodi trasfere ba munisípiu tanba sentru saude laiha faailidade kompletu”.
“Inklui, stock ai-moruk durante ne’e iha territóriu nasionál sufisiente maibé iha sentru saúde dala ruma item balun menus atu responde ba moras sira, ne’ebé pasiente sira hasoru”. Nia subliña
Preokupasaun ne’ebé durante ne’e iha sentru saúde enfrenta maka menus fasilidade maibé sira nafatin buka meios, kordena ho autoridade sira oinsa atu bele solusiona ba problema hirak ne’e
Fasilidade ne’ebé akumula iha sentru saúde Soibada kompostu husi, karreta ambulania ida (1) oxijeniu, haat (4) kama ba inan isin rua sira ne’ebé partu inklui kama ba maluk sira ne’ebé mai konsulta ho moras oioin
Nia haktuir iha tinan tolu liu ba kotuk pessoal saúde sufisiente atu halo atendementu ba pasiente sira, maibé hahu fulan marsu ate agora sentru saúde hasoru problema menus pessoal médiku sira, tanba mediku nain tolu (3) konkore vaga ne’ebé publika liu husi pagina Hospital Nasionál Guidu Valadares (HNGV) hodi ba serbisu iha hospital nasionál.
Entertantu, pessoal saúde ne’ebé oras ne’e hala’o serbisu iha sentru saúde, Soibada kompostu husi médiku feto ida(1) Enfermeiru mane nain hat (4), parteira rua (2), tekniku laboratoriu rua (2), farmasista ida (1), nutrisaun rua (2) asistente malaria ida (1) saúde públiku rua (2), voluntariu rua(2) Administrasaun ida (1) finansas ida (1) motorista ida(1) no cleaner ida (1) total pessoal saude ativu hamutuk 23 kompostu husi feto 11 mane 12.
Jornalista . Guilhermino Ramos da Cruz