SEDL Inaugura Uma OPS Iha Hera, Mateus Promete Sei Kontinua Projetu Refere

SAPNewsTL, Dili : Sekretariu Estadu Dezenvolvimentu Lokal (SEDL), hamutuk ho Komandante PNTL Munisipiu Dili, Prezidente Auturidade Munisipiu (PAM) Dili, inaugura Rezidensia Ofisial Polisiamentu Suku (OPS), iha Suku Hera, Posto Administrativu Cristo Rei, Munisipiu Dili.

Iha diskursu, Sekretariu Estadu Dezenvolvimentu Lokal, Mateus Wilfredos dos Santos Tallo hateten, hahu husi governu anterior mai to’o governu ida ne’e, tau ona prioridade ba dezenvolvimentu Setor Seguransa.

SEDL ne’e afirma ba oin sei kontinua implementa tipu projetu sira ne’e tanba parte ida husi projetu ne’e maka, atu kontribui ba redusaun problema sosial iha komunidade.

“Ha’u nia parte sei tau prioridade ba projetu refere, tanba iha futuru ita sei melloria servisu kona-ba planu dezenvolvimentu komunitaria nian. Tan ne’e kestaum sosio-ekonomika maka sei sai area importante ba futuru iha programa governu nian,” dehan SEDL Wilfredo dos Santos tallo, Iha Hera, 06/09/2023

Governante ne’e mos husu ba Auturidade Lokal sira, liu liu parte Seguransa, PNTL Eskuadra Cristo Rei, atu tau matan hela ba Edifisiu OPS, ne’ebe inagura ona, nunee bele utiliza ho didiak to’o longu prazu, karik sistema seguransa troka malu karik, nafatin asegura no kuidadu nafatin uma refere hodi labele hetan estraga

Iha fatin hanesan, Komandante PNTL Munispiu Dili, Superentidente Xefi Orlando Gomes, husu ba SEDL, atu projetu Uma OPS ne’e, labele para iha ne’e deit, maibe tenke kontinua mos iha Suku seluk ne’ebe presiza, tanba realidade hatudu katak, Eskuadra PNTL balun mak seidauk iha uma.

“Ami husu ba SEDL atu tau prioridade liu ba fatin sira ne’ebe ita konsidera risku ba konflitus, oinsa kria kondisaun ne’ebe diak, nune’e bele fasilita ofisial Suku sira hodi fo atendimentu ne’ebe diak ba ita nia komunidade sira, tanba kapital Dili sai hanesan fatin ne’ebe risku ba konflitu, nomos iha Munisipiu balun,” Tenik Superintendente Orlando Gomes

Jornalista : Marcela Mesquita Lemos