SMTL Gradua Membru 46, Promete Kria Damen & Belun Ba Ema Hotu
SAPNewsTL, Lautem: Organizasaun Silat Makikit Timor Leste (SMTL) realiza aktividade graduasaun daruak ba membru sira hamutuk haat nulu resin neen (46), Prezidente Silat Makikit Timor Leste (SMTL) Calope Nascimento husu membru sira atu hadook an husi konflitu
Iha intervista Prezidente Silat Makikit Timor Leste (SMTL) Calope Nascimento hateten aktividade graduasaun ne’e realiza atu fo graduasaun ba membru sira tuir level hodi hasa’e sira nia sintu
“Ohin ami realiza aktividade ida ne’e atu fo graduasaun ba membru sira, ba membru sira ne’ebé balun foun balun tuan ona hasa’e sira nia sintu, husi sintu kinur sa’e ba matak, matak ba azul, azul ba kor kafe no sa’e ba metan”. Dehan Prezidente Silat Makikit Timor Leste (SMTL) Calope Nascimento iha intrevista hafoin ensera aktividade graduasaun iha Etanice, Suku Cotamuto, Postu Administrativu Luro, Munisipiu Lautem, 10/09/2023
Prezidente Makikit hatutan ba membru sira ne’e hasa’e sintu ne’e ho hamutuk haat nulu resin neen mak partisipa iha aktividade graduasaun ida ne’e, membru sira ne’e husi Postu Luro, Munisipiu Lautem.
“Ami nia membru sira hamutuk haatnulu resin neen mak ohin tuir graduasaun, matak hamutuk sanulu resin haat, Azul hamutuk ruanulu resin haat, Kor kafe nain tolu no metan ema nain lima”. Prezidente informa
Prezidente SMTL ne’e hameno ba membru sira atu hadook an husi krime, konflitu maibe buka halibur ema hotu-hotu hodi harii paz no establidade iha sosiedade.
“Husu ba membru sira, hatene respeita ema, labele halo konflitu iha sosiedade, halibur ema hotu-hotu, harii paz, unidade, hakmatek iha sosiedade atu nasaun ida ne’e hakmatek”. Nia tatoli
Iha fatin hanesan Konseleiru Masimu Silat Makikit Timor Leste (SMTL) Rafael Soares parabeniza membru sira ne’ebé simu no hasa’e ona sintu no nia husu atu membru sira nafatin iha dixiplina no sai belun ba ema hotu-hotu
“Ha’u fo parabens ba imi tanba ohin imi hasa’e ona sintu, imi tenke dixiplina, respeita inan aman, respeita imi nia maluk sira labele halo problema, imi tenke hatene hakuak ema sai belun ba ema hotu-hotu”. Dehan Konseleriu SMTL
Entretantu, Silat Makikit Timor Leste (SMTL) hala’o kongresu nasional iha fulan Setembru 2022 hetan ona karta afiliasaun husi IIndonesi,
nune’e sira hamrik mesak nu’udar organizasaun ida iha nasaun ida, sira prosesa ona sira nia dokumentus no hein legalizasaun husi Ministeriu Justisa.
Jornalista : Luis Pailofo