SAPNewsTL, Dili : Ministériu Juventude Desportu Arte Kultura sigla portuges (MJDAC) sosializa anti-doping ba jogador juvenil Nain-50, nune’e jogador sira bele hatene saida anti-doping.
“Atividade ita fahe informasaun kona ba anti-doping ida ne’e hola parte husi advokasia, obrigasaun governu tenke halo ba modalidade desportu hotu tanba obrigasaun ba ita nia atleta sira iha Timor-Leste, nune’e sira iha informasaun kona ba anti-doping ba aban bainrua nian,”
“MJDAC hahu fahe informasaun anti-doping atu nune’e fo kuñesimentu diak liu tan ba federasaun sira hotu hahu ho labarik sira tanba husi kiik sira kunese anti-doping sira bele dixiplina liu tan hodi sai atleta profesional”, dehan ministru juventude desportu arte kultura Nelyo Isaac Sarmento ba jornalista sira iha Xanana Sport Center Bairro Formosa, Dili sabadu (16/03/2024).
Ministru hatutan, agora mos governu iha konsentrasaun atu kria komisaun anti-doping iha Timor-Leste maski agora Timor-Leste seidauk iha kondisaun maibe apoiu mai husi UNESCO no mos apoiu tekniku husi komisaun anti-doping internasional ho Azia nian preparadu inisia tinan ida ne’e posibilidade kria komisaun anti-doping iha Timor-Leste.
Nelyo informa tan, daudaun ne’e Timor-Leste nu’udar nasaun inklina an iha Azia no mundu liuliu ba regra sira nu’udar prosedimentu hala’o iha desportu nune’e Timoroan liuliu hahu husi formador ka treinador, ekipa tekniku, mediku fiziku ho hahan ninian no atleta sira iha kunesimentu luan ba anti-doping atleta ida labele detekta uza doping tanba bainhira atleta uza doping nia tenki sofre prestasaun hetan iha nivel internasionál ho nasional la vale no futuru atleta la iha ona.
Nia afirma tan, mensajen ba labarik sira mak ne’e informasaun aprende ba nune’e iha kunesimentu atu sai atleta profesional tanba laos atu aprende deit joga ka tekniku nian maibe iha kunesimentu luan kona ba kondisaun saida mak atleta iha.
Iha fatin hanesan jogador juvenil Devanio da Costa Gomes hatete, nia kontente bele hetan informasaun kona ba anti-doping nian.
“Ha’u kontente tanba ohin loron bele hetan informasaun kona ba anti-doping katak fo impaktu ba ita nia saúde bainhira ita konsumu bele hetan moras aten boot no rins tan ne’e ita tenki prevene labele utiliza anti-doping”.
Entretantu, partisipante sira iha sosializasaun ne’e mai husi jogador juvenil nain-50 husi sentru futebol juvenil Timor-Leste hamutuk treinador sira.
Reportajen: Augusto dos Santos