Buka Uluk Maromak, Buat Hotu Sei Aumenta Ba Ita
SAPNewsTL, Dili : Iha ámbitu tempu Quaresma Pe. Antonio Quenser fo retiru ba funsionário sira iha TELKOMCEL. Objetivu husi retiru ne’e hodi sira prepara an molok tama ba festa paskoa tinan 2024.
Padre Antonio Quenser sente kontente tanba empreza TELKOMCEL bele fo espasu hodi fo retiru ba funsionáriu sira, hein katak sarani sira labele hadok an husi Maromak nia ukun fuan hanorin.
“Ita presiza prepara an molok tama ba festa paskua, tempu quaresma fo atensaun mai ita hare ita nia an ho lalenok mistériu Kristu nia terus, mate no moris hias, ita tenki rona Maromak nia liafuan hodi haboot no hametin fiar nu’udar sarani katólika.” Tenik Pe. Antonio Quenser liu husi reflesaun iha Timor Plaza, 13/03/2024
Padre ne’e mos sente kontente tanba empreza boot hanesan TELKOMCEL bele kontinua investe fiar no moral ba nia staff sira hodi labele hadok an husi dalan Na’i Maromak.
“Ha’u kontente tanba TELKOMCEL kontinua investe iha fiar no moral, ida ne’e importante tebes, ha’u husu imi atu kontinua aktividade ne’e ba oin”.
Iha fatin hanesan, Funsionária TEMKOMCEL Joana Pereira Miranda sente orgullu tanba bele partisipa retiru refere no halo reflesaun ne’ebe klean ba sira nia moris.
“Ha’u sente haksolok tebes bele partisipa retiru ne’e tanba enkoraja ami nu’udar sarani atu laos hanoin deit servisu buka osan maibe númeru dahuluk mak tenki buka uluk maromak, tanba Maromak dehan, Buka uluk Maromak nia reinu maka buat buat hotu sei aumenta ba ita”. Dehan Joanpa Pereira Miranda
Feto potensial iha TELKOMCEL ne’e mos husu ba ema hotu atu uza tempu kuaresma ne’e hodi buka perdua malu, tulun ema kbiit laek sira no hola parte iha viasakra.
“Tempu Quaresma, ita perdua malu, koko atu tulun ema seluk tuir kbiit ne’ebe ita iha, hola parte iha Viasasra. nu’udar sarani katólika kontribui ba paz, no moris diak sosiedade”.
Joana mos husu ba sarani sira hotu iha Timor Leste hodi reza ba papa Francisco nia saude diak atu nune bele vizita Timor Leste iha fulan agustu tinan 2024.
Jornalista : Conzita Mota