Mudansa Klimátika & Husik Animal Livre ! Tebes, Fo Impaktu Negativa Ba Komunidade

SAPNewsTL,Lautem – Komunidade sira  iha Munisipiu Lautem postu adminiatrativo Lore Suku Lore 1, preokupa no triste tanba mudansa klimátika no ema husik animal livre fo impaktu negativa ba sira nia produsaun agríkola no halo sira kontinua moris ho vulneravilidade.

Iha intervista, Inan feton Linda Ximenes haktuir atividade  ne’ebe lor-loron nia hala’o maka halo to’os hodi hatan ba nesesidade familia nian tanba parseiru moris sofre defisiente iha matan.

“Atividade ne’ebe ha’u hala’o lor-loron maka halo to’os,  halo to’os hodi sustenta ha’u nia oan na’in ualu  (iha feto haat no mane haat) tanba ha’u nia katuas oan hetan moras ka defisiente iha matan”. Tenik Linda Ximenes ba jornalista sira liu husi media tour iha Aldeia Horolata, Suku Lore 1, Lore,30/05/2024

Linda Ximenes hatutan, atividade seluk ne’ebe nia halo hodi hetan osan maka liu husi faan nu tanba husi faan produtu refere bele hetan rendimentu naton hodi atende nesesidade uma laran no apoia oan sira ba eskola.

“Atividade ida ne’ebe ha’u halo mak fa’an nu, tan husi nu ne’ebe fa’an mak hetan osan sira hodi atende nesesidade familia nian  no oan nia eskola, dala barak osan la to’o entaun fa’an fali produtu ne’ebe kuda iha to’os laran, bainhira la to’o nafatin iha pasiénsia tanba ne’e mak ita nia realidade”. Linda Ximenes hateten

Inan feton ne’e informa, produtu barak ne’ebe kuda iha to’os laran hanesan batar, talas no aifarina, maibe sente triste tebes tanba to’os ne’ebe ho kondisaun laiha lutu ikus mai animal ba estraga hotu.

“Ha’u ba halo to’os mesak tanba hare ba  ha’u nia laen nia kondisaun ne’ebe  moras ho difisiensia matan la hare, serbisu ida ne’ebe todan ba ha’u maka  halo lutu ba to’os ne’ebe ha’u halo, lutu  ha’u halo maibe ha’u nia forsa la to’o ha’u labele asesu hotu ba produtu ne’ebe  iha to’os laran tanba animal sira estraga hotu”.

“To’os ne’ebe ha’u halo maka  kuda  ai han tradisional hanesan batar, talas no aifarina maibe lutu ne’ebe ha’u halo ladun diak tanba ha’u mos laiha forsa hodi halo diak entaun animal  hanesan karau sira maka ba estraga hotu, realidade ida ne’e lak halo ha’u triste”. Nia dehan

Wainhira iha tempu udan, produtu barak ne’ebe kuda bele buras iha to’os laran maibe produtu balun ular no lakateru han, maibe iha tempu bailoron, so aidila no ai-farina mak moris.

Linda konsidera mudansa klimátika fo duni impaktu ba agrikultor sira tanba udan la mai tuir nia tempu difikulta agrikultor sira nia produsaun agríkola iha terenu.

“Liga ho mudansa klimátika, iha Lautém-Lore dala ruma udan monu rai sedu no tarde, bainhira tempu udan, entaun hahan produtu seluk iha mais kuandu laiha ona  iha de’it modo hanesan aidila tahan no aifarina tahan”.

“Iha Lore, udan monu rai hahú iha fulan marsu, udan loron kalan hela deit mais ha’u tenki obriga an, kuandu hahan laiha ona tenki ba tos para buka lori mai, no ami han iha uma laran. Udan beibeik hanesan ne’e buat hotu susar ba ami, ai-maran deit mos laiha buka araska, hahan deit susar los ami atu ba buka tanba udan la fo tempu ba ita, atu  ba tos no buka aihan sira ne’ebe iha to’os laran”. Nia konta

Linda deklara produtu ne’ebe kuda iha to’os laran la naton hodi lori ba asesu merkadu tanba han deit mos la to’o, entaun difisil atu hasa’e rendimentu familiar, produtu seluk ne’ebe substitui mak nu tanba postu Lore iha nu barak.

“Hahan ne’ebe kuda iha to’os laran atu lori ba merkadu mos la to’o tanba  iha tos ne’ebe kik han deit iha uma laran mos la to’o ona satan ba merkadu, produtu seluk ne’ebe substitui maka nuu deit, nuu ne’e tenki maran maibe ita mos tenki halo serbisu hotu hanesan ba  hili lori mai uma, tau iha uma  halo maran, hafoin mak fa’an, ne’e mos depende ba komprador sira”.

“Nu ne’ebe fa’an, ha’u la lori ba merkadu, faan  iha uma deit karik sira hola iha uma kilo ida kuarter (0.25 sentavus), nu ne’ebe fan ne’e kuandu la folin pasiensia maibe senti tristi tanba ida ne’e mak kondisaun moris, ha’u atu halo tan saida, pasiénsia karik hamlaha”.Nia konta

Linda salienta, sira nia fuan domin na’in ualu (8) ne’ebe iha la kontinua sira nia estudu iha nivel ensinu superior tanba ekonomia família la sufisiente hodi selu sira nia eskola, nune’e sira hela deit iha uma (Dili) no laiha servisu ne’ebe sira hetan hodi sustenta familia.

“Ha’u nia oan iha nain 8, ne’e mos la kontinua sira nia eskola tanba hare ba ami nia ekonomia uma laran, sira mos kompriende, ami la hanesan ema sira seluk, sira la kontinua eskola tanba osan laiha balun para iha ensinu sekundaria  nunka ida ba eskola iha universidade”.

“Agora sira iha Dili hela ho familia, tempu iha mak sira mai haree, sira iha Dili mos halimar deit la hetan serbisu, ho kondisaun ha’u nia katuas oan moras,  bainhira ba to’os tenki  tein uluk no prepara tiha hahan mak sai, kuandu ha’u mos moras hotu entaun ami pasiensia deit ona  tanba oan sira ba dok, ne’e mos tanba kondisaun moris hanesan ne’e. Bainhira presiza ruma, ami pasiensia, atu atende malu karik iha pulsa ruma iha telefone ba oan sira maka bele ajuda karik laiha pasiensia”.

Iha sorin seluk, inan faluk  Alcina Ximenes hateten, nu’udar inan faluk ida sente iha responsabilidade hodi halo esforsu hotu ne’ebe bele hodi sustenta oan sira nia eskola liu husi hili nu maran no fa’an nu.

“Ha’u nu’udar feto faluk ida sente iha responsabilidade hodi halo buat ne’ebe bele liu husi hili nuu maran ba faan, nune’e bele selu oan sira nia eskola no atende ba nesesidade uma laran”. Inan Faluk Alcina Ximenes hatete.

“Ha’u sente todan wainhira haree ba nesesidade lor-loron nian ho oan sira, maske laiha ona parseiru tamba maromak nia planu oin seluk, maibe ha’u nu’udar feto faluk ida sai inan no aman hodi buka osan atu bele sustenta ha’u nia oan sira nia eskola no ba nesesidade lor-loron nian”.

Maske todan nune’e, maibe Alcina Ximenes afirma nia parte simu realidade ne’ebe mosu tanba laiha moris ida diak, diak to’o rohan la’ek no aat, aat to’o rohan laek, buat hotu mosu mai tuir tempu ida-idak nian.

“Maske ha’u sente katak moris mesak todan ba ha’u nia moris lor-loron nian maibe ha’u tenki simu ho realidade moris ne’e tanba ita ema moris iha mundu sempre diak no aat ne’ebe akontese ba ita nia vida, nune’e ha’u tenki buka meius oinsa mak faan nu’u, hakiak manu, halo to’os no kuda modo hodi bele hetan osan ba sustenta moris familia nian”. Hateten Alcina

Alcina Ximenes akresenta, moris ne’ebe depende ba to’os no produtu lokal sira sempre hein udan iha tempu bailoron, maibe sempre iha dalan barak hodi halo, nune’e bele responde ba nesesidade uma laran.

“Ami nia moris depende ba to’os hanesan nu maran, kuda modo iha to’os. Produtu lokal ne’e fan de’it iha Lore, atu lori ba merkadu Lospalos ne’e wainhira produtu barak”. Nia informa

Entertantu, Xefe Suku Lore 1, Abilio Amaral hateten, mudansa klimátika ne’ebe agora akontese iha fulan hirak nia laran, udan mai lor-loron halo inan sira ne’ebe vida hanesan Agrikultor nia produtu iha to’os laran estraga total tanba ular, lakataru han no estraga barak.

“Udan monu lor-loron, halo ular no lakateru barak estraga produtu ne’ebe inan feton sira kuda iha to’os hodi fa’an, mudansa klimátika fo duni impaktu boot ba agrikultor sira iha área rural”. Nia konsidera

Enkuantu, tuir dadus uma kain iha Suku Lore 1 Postu Administrativu Lore  hamutuk 841 ho total populasaun  3.739 kompostu husi mane hamutuk 1848 no feto Hamutuk 1891.

Programa media tour ne’e organiza husi Assosiasaun Jornalista Timor-Leste (AJTL) ne’eb antes fo formasaun durante loron rua (27-28/05) no hala’o media tour iha lore durante loron 3 (29-31/05/2024), programa ne’e hetan apoiu finanseiru husi Oxfam Timor-Leste liu husi fundu mudansa klimátika husi Hongkong

Jornalista : Ermelinda Soares