Natália Produz Luhu Dudu Oan Hakiak Na’in 9 Ba Eskola No Ida Sai Membru F-FDTL

SAPNewsTL, Dili : Sidadaun Natália Ramos ho idade limanulu resin-neen (56) hela iha Postu Administrativu Likisa Villa, Munisipiu Likisa, hafoin partisipa iha expozisaun ne’ebe Fakuldade Agrikultura, Unirvesidade Nasionál Timor Lorosa’e (UNTL) realiza hodi selebra loron mundial oseanu, Avó Natália Ramos sente orgullu tebes tanba bele partisipa iha ekspozisaun ne’ebe involve ema barak hodi promove nia produtu no faan iha expozisaun refere

Tuir Avó Natália, Produtu ne’e nia produz hanesan Luhu, Karteira, Eskultura ne’ebe ho forma Lenuk, no seluk tan, produtu hirak ne’e nia halo ho nia Membru Grupu Omar Moris Mesak hamutuk ema nain 10

“Ami halo Luhu, Karteira, Bote, Eskultura ne’ebe ho forma lenuk, no balada sira seluk tan, produtu hirak ne’e ami halo desde 2003 to’o agora ho membru grupu hamutuk ema nain 10, ami halo ida ne’e hodi atende ba nesesidade familia nian, fo ajuda ba ha’u nia oan hakiak sira ne’ebe ke atu eskola iha Maliana no Dili, tanba ami nia ekonomia uma laran kuran tebtebes maibe ha’u Lori akadiru sira ne’e hodi transforma ba produtu ikus mai hetan osan dudu oan sira ba eskola”. Tenik Kordenador Grupu Omar Moris Mesak, Natália Ramos iha Auditorium Fakuldade Engenharia UNTL Hera, 07/06/2023

Avó natália hatutan, “Rendimentu ne’e depende iha desenhu kuandu di’ak entaun fulan ida ami hetan hetan 100 dolar ou bele Liu tan, se menus tan ituan entaun ema lá dun gosta Hola ou maluk sira mai husi Raí liur lá dun hetan entaun Liu husi informasaun ne’ebe ema fo, ha’u bele Lori mai entaun fulan ida ami bele hetan to’o 50 deit no dala ruma lá iha los”.nia konta ho mata-ween ba SAPNewsTL iha Hera

Nia akresenta, “Ami barak mak Ferik, joven ne’e balun deit, balun foin eskola inklui ami involve Mane balun tanba Mane maka lalais ba Hola produtu ne’ebe kuran ba ami nia grupo inklui materia sira hanesan akaderu”.

Kordenador grupu ne’e informa, grupu omar moris mesak seidauk iha fatin ne’ebe sufisiente hodi produz produtu sira ne’ebe sira planeia liliu fatin ne’ebe uza hodi fa’an produtu sira

“Ami nia problema maka fatin be hodi faan ne’e, ami faan estrada ibun maibe uma ida atu hanesan mahon ne’e maka lá iha, ami nia fatin ida mahon para ami hodi faan lá iha, ami faan iha ami nia hela fatin, ami nia uma laran deit alin balun keta ba intervista ami nia fatin ne’e hetan ami faan uma laran deit”. Nia hatete

“Ami familia ida, ami hakiak ona nain 9, oan sira ne’e maun husi Bin-alin nia oan no maun-alin sira nia oan, Agora seidauk gadua hotu maibe ida eskola iha UNTL, ida sai ona Membru FALINTIL Forsa Defeza de Timor Leste (F-FDTL) iha tinan 2014, no balun sei eskola iha Maliana”.

Kordenadora ne’e husu ba Guvernu liliu Ministeriu Turizmu no Sekretaria Estadu Arte no Kultura atu loke formasaun, promove no desenvolve produtu artístiku sira ba futuru tanba ne’e nu’udar eransa husu beialia sira nian ne’ebe kada jerasaun presiza atu hatutan obra hirak ne’e

“Ha’u hakarak husi para governu kria fatin ne’ebe diak ba produtor sira hodi faan, loke formasaun sira, no promove arte sira ba futuru tanba ne’e eransa beiala sira nian ne’ebe presiza hatutan”.

Enkuantu, Avó Natália Ramos ho nia grupu ne’e sira kontinua produz no faan deit iha Postu Administravu Likisa, Munisipiu Likisa. Karik maluk leitor sira iha interese bele kontaktu ba nomor telefone 77502790

Jornalista : Lidia Amaral