Imajen Apresentasaun Teotra husi NGO Ba Futuru iha resintu EBC Luro, Sexta-Feira, 21/10/2022.
Lautem: NGO BA FUTURU halo aprezentasaun teatru kona-ba hapara violensia doméstika, igualdade jéneru no prevene kaben sedu ba eskola sekundaria jeral Fernando Lasama de Luro.
Tuir Koordenador Projetu husi programa foinsa’e ba mudansa iha NGO BA FUTURU Angelo dos Reis objetivu husi teatru ne’e hanesan mensagem ida ba estudante sira atu bele prevene kaben sedu, promove igualidade generu no evita violensia domestika iha komunidade
“Ami halo aktividade sira ne’e iha eskola nomos iha komunidade sira tanba iha teatru ne’ebé mak sira aprezenta ida ne’e hanesan topiku ne’ebé mak importante tebes ba komunidade ida ne’ebé mak agora dadauk iha ne’e atu bele hatene didiak kona-ba mensajen importante sira hodi bele prevene sira nia an husi violensia hodi promove igualdade jeneru no mos oinsa atu prevene kaben sedu iha familia ida”. Dehan Koordenador Projetu husi programa foinsa’e ba mudansa Angelo dos Reis iha NGO BA FUTURU iha resintu EBC Luro, Sexta-Feira, 21/10/2022.
Intervista Kordenador Projetu husi programa foinsa’e ba mudansa Angelo dos Reis
Koordenador Projetu ne’e akresenta, antes sira halo aprezentasaun ekipa sira rekolla informasaun iha komunidade sira bazeia ba kondiasaun real iha komunidade hodi bele fo mensajen ba komunidade sira atu loke sira nia hanoin hodi bele aplika saida maka di’ak ba sira nia sosiedade rasik
Angelo hatutan, antes ne’e sira hahu ona ho formasaun ba programa lima kona-ba abilidade lideransa, aprende kona-ba rezolve konflitu, abilidade moris, haforsa ekonomia no ikus mak hanesan teatru.
“Teatru ne’e ami halo horseik hanesan loron primeiru ami halo iha Suku Afabubo no ohin iha eskola Secundaria Fernando Lasama de Luro i aban ami planu ba Suku Kotamuto ida ne’e hanesan primeriu grupo no sei prepara estudante hamutuk 25 hodi halo aprezentasaun ba segundu grupu ninian hodi prepara topiku foun no sei aprezenta fila fali teatru ne’e iha suku tolu, Wairoque, Lacawa no Baricafa”. Nia hatete
Koordenador ne’e mos husu ba komunidade no familia sira atu kria balansu entre feto no mane, suporta oan sira ba eskola no prevene viololensia doméstika atu labele akontese iha familia.
“La’os tempu ona atu haruka feto mak serbisu barak liu iha uma maibé oinsa atu tau didi’ak balansu jéneru iha uma laran familia nomos komunidade, oinsa apoiu oan sira ba eskola atu sira rasik deside oinsa sira hakarak atu duni sira nia karreira, koko atu responsabiliza knaar ne’ebé mak hanesan entre feto ho mane nomos prevene kedas violénsia doméstika tanba violénsia doméstika hanesan krimi públiku ida ne’ebé bele kondena ho pena ne’ebe bo’ot”. Nia hameno
Tuir foinsa’e Leda Abrilia Maria da Costa realsa, nia sente kontente tanba aprende ona buat barak husi NGO BA FUTURU no sira bele fahe ba komunidade sira liu husi teatru kona-ba Hapara Violensia Domestika, Igualdade Jéneru no Prevene Kaben Sedu.
Imajen Intervista Leda Abrilia Maria da Costa
“Ha’u sente kontente tanba sira maske ida ne’e teatru maibe sira mos sente duni katak ida ne’e akontese duni iha sosiedade nia le’et, partisipante sira mos haree kontente, ho sira nia partisipasaun halo ami kontente hodi ami kontinua nafatin ami nia aktividade ida ne’e”.nia dehan
Entretantu, Estudante Maria Madalena da Costa Ferreira 12 ano husi eskola sekundaria Geral Fernando Lasama mos sente kontente tanbe bele akompanha hodi aprende lisaun fou ruma husi teatru ne’ebe sira apresenta
“Ha’u sente kontente tanba sira bele mai aprezenta teatru iha ami nia eskola, ida ne’e sai ezemplu ne’ebé mak di’ak teb-tebes mai ami estudante sira hotu, nune’e ami halo tuir hodi ami nia futuru ida ne’e bele di’ak”.nia sublinha
Entretantu, aktividade ne’e hala’o ho grupu rua ho tópiku ne’ebé lahanesan nune’e grupu dahuluk hala’o iha Suku Afabubo, Luro no Cotamuto no grupu daruak sei realiza tan iha Suku Baricafa, Lacawa no Wairoque.
Jornalista : Luis Pailofo
Editor : Ekipa Editorial