Liga Timorense Realiza Iha Dezembru, Karketu Sei La Partisipa

DILI : Karketu Dili FC  sei la partisipa iha Liga Timorense Epoka 2022 ne’ebe realiza iha fulan dezembru tinan ne’e tanba klube sira tenki halo preparasaun fulan tolu antes tama ba liga nian.

“Ita nia liga futebol tinan 2022 atu la’o  ne’e kalendariu  minimu  antes fulan tolu tenke halo reuniaun ho klubu sira para ami halo diskusaun, nune’e ami  nia preparasaun fulan tolu antes ne’ebe agora karik obriga deit atu halo iha dezembru para atu kompleta deit relatoriu orsamentu nia hanoin Karketu Dili FC sei la partisipa iha Liga epoka 2022”, Prezidente Karketu Dili FC Adilson Ribeiro ba jornalista sira iha Estadium Munisipal Dili kinta (27/10/2022).

Prezidente akresenta, tempu naruk liga futebol Timor Leste la lao sira mos la iha tempu agora halo preparasaun depois sira mos seidauk hetan informasaun katak iha fulan dezembru nia laran atu hahu hala’o liga ba tinan  2022, sira ladun fiar  liga atu hala’o iha fulan dezembru karik hala’o iha fulan ne’e mos sira la prepara, tan ne’e sira sei la partisipa no sira deklara atu hala’o iha fulan dezembru, minimal fulan setembru ne’e tenke fo hatene ona oráriu hotu para sira halo preparasaun hanesan rekrutamentu jogador, produz farda, prepara ekipamentu  no mos preparasaun ba treinamentu.

Adilson hatete, sira mos ladun iha esperansa liga atu hahu iha fulan dezembru tanba federasaun mos seidauk iha diskuzaun ho orgaun Liga kona realizasaun Liga nian

“Ami ladun iha esperansa  liga futebol epoka 2022  ne’e atu hahu iha fulan dezembru, tanba ami haree ba preparasaun federasaun mos seidauk iha diskuzaun diak ho orgaun liga i kona-ba realizasaun liga futebol epoka 2022”, tenik Adilson

Entretantu,   Diretor Finansas Liga Futebol Timor Leste, Caetano Carceres Correia hatete, LFTL preparadu ona sei realiza liga Timorense epoka 2022  iha dezembru tinan ida ne’e, tanba submete ona proposta ba SEJD atu apoiu liga futebol epoka 2022

“Ami submete ona proposta ba SEJD, liu husi  FFTL iha loron 21 Outubru 2022  atu aumenta tan orasamentu por volta  40,000 USD hamutuk 240, 000 USD hodi realiza liga Timorense epoka 2022 iha fulan dezembru tanba ami prepara ona kalendáriu ba liga tinan 2022 ne’ebe komesa fulan dezembru remata iha fulan marsu 2023”, tenik Caetano

Reportajen : Augusto dos Santos