Assosiasaun Desportiva Ezije Kongresu Extra-Ordináriu Ba Presidente FFTL

DILI : Assosisaun 9 ho Klube rua husu  Federasaun Futebol Timor-Leste (FFTL) halo kongresu extraordinariu hili prezidente federasaun foun tanba estrutura prezidente aktual la realiza promesa ne’ebe ko’alia iha kongresu iha fulan fevereiru 2022.

“Promesa ne’ebe prezidente FFTL Francisco Jerónimo dehan iha kongresu 2022  la realiza ne’ebe dalan ida mak Prezidente FFTL atual iha fuan hadomi futebol no FFTL karik bele rezigna an ona para ita labele hamosu kongresu extrordináriu,  ami assosiasaun 9 Asosiasaun futebol munisipiu Lautem, Manatuto,  Aileu, Ainaro, Manufahi, Dili Leste, Viqueque, Dili Oeste, Asosiasaun arbitrajen, klube kampiaun divizaun dahuluk no daruak liga futebol Timor-Leste epoka 2022 foin dadauk  tuir votasaun ne’e ami nia fiar ba prezidente atual la iha ona tanba ami husu estrutura FFTL atual para hanoin ida ne’e ita bele halo kongresu extraordinariu selae rezigna an tanba mosu dezastre boot ba futebol Timor-Leste iha 2022”, porta voz Aniceto Goveia Berlelo ba jornalista sira liu husi konferensia imprensa iha Estadium Munisipal Dili kinta (26/10/2022).

Aniceto akresenta, sira haree durante mandatu estrutura FFTL atual besik ona tinan ida maibe atividade futebol paradu  tan ne’e liu husi konferénsia imprensa para atu asegura dezenvolvimentu futebol la’o diak  iha  Timor-Leste, presiza asaun imediatamente husi parte hotu, tanba liafuan públiku hatete saida futebol hakdasak no liga la lao kestaun ne’e soke fuan  ba sira ne’ebe pratika futebol no hadomi futebol iha Timor-Leste no tinan  2022 mosu dezastre boot ba futebol Timor-Leste tanba liga futebol la la’o

Porta voz ne’e fundamenta, Prezidente FFTL atual promete iha kongresu FFTL 2022 ne’ebe atu halo  divizaun  datoluk liga futebol iha munisipiu maibe daudaun ne’e la realiza, treinador internasional rezigna tanba FFTL la selu salariu, orsamentu insentivu ba jogador sira seidauk selu, selesaun nasional U-16 la partisipa kualifikasaun AFC U-17 2022, subsidiu ba asosiasaun husi fulan agostu to’o agora seidauk selu

Portavoz ne’e mos husu estrutura FFTL atu halo kongresu extraordinariu tanba sira la servisu tuir estatutu FFTL ne’ebe asosiasaun mak iha direitu hili no troka prezidente FFTL.

“Ami husu estrutura FFTL atu halo kongresu extraordinariu tanba sira la halo tuir promesa iha kongresu, la servisu tuir estatutu federasaun nian tanba ami mak hili prezidente FFTL no ami mak iha direitu hili  troka bainhira la halo servisu hodi dezenvolve futebol iha Timor-Leste”, tenik Aniceto

Iha sorin seluk Prezidente Emmanuel FC Aleixo Monteiro Avansa hatete, iha estatutu FFTL artigu 23 katak lider iha FFTL mak inkapasidade ona artigu ne’e fo dalan para kongresu extraordinariu.

“Iha estatutu FFTL artigu 23 katak bainhira lider ida ezerse iha FFTL maka inkapasidade ona, artigu ne’e fo dalan para ita halo kongresu extraordinariu, agora ami hamutuk ne’e asosiasaun sia no klube rua ne’ebe maioria ona ne’ebe husu FFTL halo oráriu ba kongresu extraordinariu ka rezigna an ona tanba foin daudauk prezidente FFTL Francisco Jerónimo manan ho votu 11 para normaliza futebol iha Timor-Leste, Prezidente FFTL la iha razaun atu labele orariu ba kongresu extraordinariu tanba ami mak hili nia atu sai prezidente FFTL no ami  mak iha direitu para troka prezidente FFTL bainhira servisu la dezenvolve futebol iha Timor-Leste”, nia kestiona

Iha fatin hanesan Prezidente Asosiasaun Futebol Dili Leste Ipolito Soares hatutan depois halo konferensia imprensa sira sei haruka karta ba FFTL para husu halo kongresu extraordinariu

“Depois konferensia imprensa, ami sei haruka karta ba FFTL  para husu halo kongresu extraordinariu se prezidente FFTL la reasaun atu halo kongresu extraordinariu, ami sei ezizi nafatin para realiza kongresu  duni no asaun pasifiku  tanba problema daudauk ne’e mosu estrutura FFTL mak halo atividade futebol la la’o”, hatete Ipolito

Prezidente ne’e hatutan, atividade futebol la la’o no selesaun nasional atu reprezenta Timor-leste mos faila ida ne’e mak razaun fundamental ba sira hodi ezizi para halo kongresu extraordinariu para hadia futebol iha Timor-Leste, karik la iha  resposta sira sei halo karta mos ba AFC no FIFA

Enkuantu, to’o notísia ne’e fo sai SAPNewsTL tenta atu halo komfirmasaun ho Presidente FFTL maibe. Infelizmente, seidauk hetan resposta husi Lider FFTL Francisco Jeronimo

Reportajen : Augusto dos Santos