NGO Ba Futuru Sertifika Juventude Ba Mudansa Hamutuk 54 Iha Luro
Imajem juventude Postu Luro hafoin simu sertifika, iha salaun enkontru Administrasaun Postu Administrativu de Luro, Kinta-Feira, 9/02/2023.
SAPNewsTL, Lautem : Koordenador Projeto JOVEN BA MUDANSA Remegito Jorge apresia tebes ho juventude Luro tanba durante tinan ida sira tuir formasaun ne’e ho vontade tebes no partisipativu, antes ne’e formandu sira hamutuk neen nulu resin neen maibe to’o de’it iha limanulu resin haat.
“Apresia tebes ho youth changemakers sira tanba durante tinan ida ne’e, sira tuir ho vontade di’ak signifika sira iha espiritu partisipativu tanba ne’e mak montante partisipante ne’ebé mak iha husi inisiu neen nulu resin neen (66), ami hahú no ikus mai termina ho ami entrega sertifikadu ne’e ho limanulu resin haat (54)”. Dehan Koordenador Projeto JOVEN BA MUDANSA Remegito Jorge iha salaun enkontru Administrasaun Postu Administrativu de Luro, Kinta-Feira, 9/02/2023.
Koordenar ne’e hatutan hanesan organizasaun ne’ebé responsabiliza ba forma sira, oinsa sira iha mudansa tanba durante tinan ida sira tuir formasaun modulu lima ne’e no sira aplika kedas hanesan sira aprezenta teatru ba komunidade sira.
“Sira la’os mai tuir de’it maibe sira tuir, wainhira sira aprende hotu sira aplika kedas, tanba ne’e mak sira halo community servise, sira mos hatudu asaun iha teatru ne’e tanba sira hotu-hotu kapasitadu ona tanba ne’e sira ba implementa ona ba komunidade”. Nia informa
Jornalista SANewsTL intervista Koordenador Projeto JOVEN BA MUDANSA Remegito Jorge
Jorge mos hameno ba juventude ba mudansa sira iha Postu Luro atu nafatin mantein ho espiritu hodi nafatin partisipa iha aktividade iha komunidade no hatutan buat ne’ebé sira aprende atu labele to’o de’it iha sira.
“Sertifikadu hanesan surat de’it, buat ne’ebé mak sira tenke halo mak nafatin firme ho sira nia espiritu vontade, aktivu i partispa iha kualker aktividade iha sira nia komunidade atu nune’e buat ne’ebé sira aprende ne’e la hela ho sira deit, i bele mos ba ema seluk lori benefisiu ba sira nia komunidade”. Nia teni
Iha fatin hanesan, Juventude ba mudansa Evarinda Pinto agradese ba NGO BA FUTURU ne’ebé fasilita ona formasaun ba sira durante tinan ida no sira bele aprende ona buat barak.
“Ha’u agradese ba prezensa NGO BA FUTURU liu husi programa ne’e bele inspira Juventude Halo Mudansa, tanba liu husi sira ha’u bele aprende buat barak hanesan abilidade resolve konflitu, abilidade lideransa, abilidade haforsa ekonómika, abilidade moris no abilidade halo teatru no halo aprezentasaun teatru ba públiku”. Nia hatete
Entretantu, serimonia graduasaun ba juventude ba mudansa iha Postu Administrativu Luro ne’e partisipa husi Reprezentante Administrador do Postu Administrativu de Luro, Administrador do Postu Administrativu de Luro, Unidade Servisu Postu Administrativu-SEJD iha Postu Luro no Koordenador Escola Secundária Geral Fernando Lasama de Luro.
Jornalista: Luis dos Santos