ONU & PN Hasoru Malu, Husu ParPol Prioritiza Seguransa Ai-Han No Nutrisaun
Organizasaun Nasoens Unidas (ONU) no Parlamentu Nasional Timor Leste Hasoru Malu Deskute Kona-Ba Seguransa Ai-Han No Nutrisaun iha Timor Leste
Imajen Intervista Kordenador Movimentu Hadiak Nutrisaun Gerda Verburg iha Resintu PN, hafoin hasoru malu ho Presidente Parlamentu Nasional Aniceto Guterres, iha Uma Fukun PN, 29/11/2022. Foto : Ermelinda Soares
SAPNewsTL, Dili- Organizasaun Nasaun Unidas (ONU) liu husi kordenador movimentu hadiak nutrisaun Gerda Verburg hetan konvite husi primeiru ministru Taur Matan Ruak vizita Timor-Leste durante loron tolu, iha ne’ebe hasoru ona Prezidente Parlamentu Nasional ho Deputadu sira ko’alia seguransa ai-han no nutrisaun iha Timor Leste
“Ohin ha’u ko’alia ho Parlamentu Nasional atu bele tau iha politika hodi dezenvolve seguransa aihan no nutrisaun sai prioridade politika ba partidu hotu-hotu tanba ida ne’e importante tebes ba dezenvolvimentu kapital humanu no ekonomia iha Timor Leste nian tanba depois indenpendensia demokrasia, paz, no estabilidade, tuir kedas ida ne’e mak dezenvolvimentu ekonomia, sosial liu liu dezenvolvimento iha ema katak dezenvolve nia fiziku no kakutak ne’e importante tebes”, dehan kordenador movimentu hadiak nutrisaun Gerda Verburg ba jornalista sira iha resintu parlamentu nasional tersa (29/11)
koordenador ne’e akresenta sira mos ko’alia kona-ba importansia atu investe iha ema liliu ba labarik sira hahu husi nia loron moris dahuluk no mos enfazia importansia kona-ba susu been ba labarik nian, PN konkorda tebes hodi apoiu lei kona ba formula susubeen sira nune’e mos PN mos apoiu tebes kona ba lei fortifikasaun aihan sira hanesan fos, trigu, mina no seluk tan atu nune’e aihan sira ne’e bele iha konteudu vitamina ne’ebe importante ba dezenvolvimento fiziku no kakutak ema nian
Nia informa, ema hotu hatene tinan oin Timor-Leste sei halo eleisaun maibe depois ida ne’e nutrisaun no seguransa aihan bele sai nafatin prioridade ba partidu politiku hotu
“Ita hotu hatene, tinan oin Timor-Leste sei halo eleisaun maibe hein katak depois eleisaun fator nutrisaun no seguransa aihan bele sai nafatin prioridade ba partidu politiku hotu, ita hein ba oin governu sira atu forma ba partidu politiku sira hotu”, tenik nia
Enkuantu, tuir dadus ne’ebe SAP News Timor Leste asesu antes ne’e malnutrisaun iha Timor Leste atinje ona 48% tanba kauza husi hahan ne’ebe la saudavel, rendimentu kiik, numeru kiiak aumenta kuaze 42 %, Dezempregu aumenta inklui problema sosial sira seluk tan
Reportajen : Ermelinda Soares
Editor : Ekipa Editorial