Ponte Buanurak Kotu, Dario Husu MOP Loke Estrada Alternativu
Mota Boot Resulta Ponte Buanurak Kotu Difikulta Sirkulasaun Transporte Sira Husi Munisipiu Vikeke
Imajen Bus diresaun Munisipiu Vikeke halai liu husi mota tanba ponte buanurak kotu, Foto : Sosial Media
SAPNewsTL, DILI : Deputadu Bankada Frente Revolusionariu Timor Leste Independente (FRETILIN) Dario Madeira husu Ministeriu Obras Publikas (MOP) loke estrada alternativa ba ponte Buanurak ne’ebe kotu tanba bainhira udan tun motor kareta sei la liu no impede funsionariu barak atu hala’o nia servisu iha munisipiu Viqueque.
“Ha’u husu ba iha ministeriu obras publika bele konsidera pedidu ne’ebe mai husi munisipiu Viqueque nian hodi loke estrada alternativu ba ponte Buanurak ne’ebe kotu tanba hodi mosu fali iha ponte pires, nune’e ema bele asesu ba Munisipiu Viqueque”, Dehan Deputadu Dario Madeira ba jornalista sira iha Plenaria Parlamentu Nasional segunda liu ba (05/12)
Deputadu hatutan, bainhira iha tempu udan karik la iha dalan alternativu sei difikulta komunidade sira nia viazen tama ba Viqueque villa liuliu impede funsionariu sira hala’o servisu iha munisipiu ne’e
Imajen Ponte Buanurak ne’ebe Kotu
Nia informa, karik laiha dalan alternativu, hodi hein konstrusaun mak agora tama ba tempu udan ema labele tama ba Viqueque villa
“Karik ita hein halo kontrusaun ponte Buanurak foun ne’e ita labele garantia ida ne’e tanba servisu barak ona Xineza sira halo ponte fulan neen ka ualu nia laran mos transporte seidauk bele liu ne’ebe ponte Buanurak foin mak atu halo ne’e tanba hahu iha dezembru, janeiru no fevereiru udan boot ema labele tama iha Viqueque Villa ona karik seidauk iha dalan alternativu husi MOP rasik”, tenik deputadu
Entretantu, Ponte antiga ne’e kotu tanba kauza husi udan boot hodi resulta mota ho grande volume, portantu fo peso no presaun ba ponte refere, maka ikus mai ponte refere kotu. maske nune’e maibe Konstrusaun Ponte Buanurak sei iha hela faze konstrusaun husi Empreza Internasional COVEC
Reportajen : Ermelinda Soares
Editor : Ekipa Editorial