Osório Kestiona LFTL Laiha Transparensia
SAPNewsTL, Dili: Tuir Prezidente Klube AS Ponta Leste FC Osório Florindo da Conceição hatete, Orgaun Liga Futebol Timor Leste (LFTL) tenke aprezenta orsamentu husi patrosinador ba publiku labele halo segredu tanba Futebol no LFTL ne’e públiku nian.
“LFTL ne’e públiku nian ne’ebé simu osan husi se de’it tenke relata ba públiku liu-liu ba Ita nia governu, se relata ne’e sala iha ne’ebé no segredu saida tanba ita haree naran patrosinador barak mak ita haree iha kampu, atu nune’e SEJD hatene kapasidade orsamentu LFTL nian hodi apoiu osan tuir ida ne’e, selae ita nia governu apoiu orsamentu ba ita nia orgaun liga la ezekuta hotu submete fila fali no dalaruma la to’o, tanba ne’e ita orgaun liga nia planu mak lalos”. Prezidente Klube AS Ponta Leste Osório Florindo
Prezidente Klube ne’e akresenta, orsamentu husi SEJD nian ne’ebé bo’ot liu osan patrosinador ne’e bele halo relatóriu maibé tanba sa osan husi patrosinador ne’e sira labele halo relatóriu.
“LFTL ne’e segredu saida mak labele aprezenta orsamentu husi patrosinador ba públiku, se orsamentu 500 Ka 1000 hatete sai ne’e mos lakoi ne’e difikuldade saida, orsamentu bo’ot liu ida ne’e mai husi SEJD sira bele halo relatóriu maibé orsamentu husi patrosinador sira labele halo relatóriu fali”. Tenik nia
Eis Sekretariu Estadu Juventude no Desportu ne’e hatutan klube mos halo tiha ona diskusaun no sira husu problema saida mak LFTL labele halo relatóriu husi patrosinador ba governu nu’udár membru LFTL tenke hatene finanseiru husi patrosinador.
“Ami husu problema ne’e saida mak LFTL labele halo relatóriu orsamentu husi patrosinador ba governu no públiku, tanba governu sempre kestiona ba LFTL orsamentu husi patrosinador ba liga Timorense ne’e sira tau orsamentu hira LFTL tenki aprezenta tanba tuir lolos ami hanesan membru ba LFTL iha direitu atu hatene, FFTL tau osan ona, LFTL tenki halo klareza labele ezize ba ema seluk ko’alia transparensia maibe sira rasik la halo”. Nia kestiona
Nia salienta karik LFTL nonok, FFTL tenki halo inisiativa bolu klube sira tur hamutuk ko’alia distribuisaun orsamentu ne’ebe orgaun rua ne’e tau ona atu nune’e aseita malu Liga Timorense epoka ne’e bele la’o ona.
“Orsamentu FFTL no SEJD tau ona hamutuk 400, 000.00 USD, tanba orgaun rua ne’e ida-idak tau 200.000.00 USD, karik LFTL nonok FFTL tenki halo inisiativa bolu klube sira tur hamutuk tanba bainhira ami halo enkontru ho FFTL ami prepara ona draf ka proposta ida kona ba distribuisaun finanseiru ne’ebé FFTL no SEJD tau ne’e, ami atu diskute orsamentu ba premiu jogu, taxa nian, arbitrajen, match comisioner no finansial suportasaun ba klube sira ne’ebé ami haree sufisiente Liga Timorense epoka ne’e ba full kompetisaun hamutuk ho kopa 12 Novembru ami aseita karik la to’o jogu ita tenki halo metade kompetisaun deit”. Osório afirma
Eis Deputadu ne’e fundamenta, LFTL mak implementador no estatutu la taka dalan atu klube sira sai mos membru ba LFTL no FFTL.
“Publiku hatene LFTL mak implementador liga timorense ne’e maibe sei nonok razaun saida, ne’ebe orgaun LFTL ne’e iha FFTL nia okos no klube sira iha FFTL nia okos maibe estatutu FFTL mos la taka dalan bainhira klube sira organiza bele mos sai membru, governu tau osan, LFTL nonok tanba selesaun nasional U-19 no U-23 ba kompetisaun AFF atu la’o fali ona ne’ebé liga la la’o rezultadu atu sai oinsa”. Nia hatete.
Enkuantu, molok notisia ne’e tun, Jornalista SAPNewsTL tenta halo konfirmasaun dala rua ba parte LFTL, maibe infelismente seidauk fo resposta tanba okupadu ho servisu seluk
Jornalista: Augusto dos Santos
Editor: Luis dos Santos