Padjadjaran Sei Simu Apoiu 94,100 USD Husi SEJD

SAPNewsTL, Dili: Assosisaun Silat Padjadjaran Nasional (ASPN)  sei simu apoiu finanseiru  husi Sekretariu Estadu Juventude Desportu (SEJD) liu husi Komisaun Regulador Arte Marsial (KRAM)  ho montante 94,100 hodi dezenvolve organizasaun husi fundu millaun 2,5 ba apoiu organizasaun arte marsial 17 iha Timor-Leste.

“Ami husi ASPN sente kontente no orgullu ba programa governu nian tau  matan ona ba Arte marsial sira, tan ne’e iha loron 10 fulan fevereiru 2023 ne’e ami ba hasoru SEJD liu husi KRAM, sira sei apoiu finanseiru ba organizasaun arte marsial sira iha Timor-Leste hamutuk 17 inklui Padjadjaran ne’ebe ami sei simu orsamentu montante 94,100 USD husi SEJD liu husi KRAM, ami sente sufisiente tanba montante boot no todan ba ami tanba sei ezekuta orsamentu ne’e tuir KRAM  nia programa dezenvolve organizasaun selae hetan sansaun husi KRAM bainhira ezekuta orsamentu la tuir program ne’ebe iha ona”, dehan Vise-Prezidente ASPN Teotonio Pinto ba jornalista SAPNewsTL iha edifísiu INAP, Comoro, segunda (13/02/2023)

Vise-prezidente hatutan, orsamentu ne’e KRAM sei manda mai organizasaun Padjadjaran tuir faze durante tinan tolu nia laran, faze dahuluk iha tinan 2023  sira sei transfere orsamentu  ho montante 31,000 USD bainhira tinan ida ne’e mak ezekuta orsamentu ne’e hotu halo pedidu husu tan ba SEJD liu husi KRAM no orsamentu iha tinan ne’e sei utiliza ba halo formasaun ba treinador sira, formasaun ba arbitrajen sira, sosializa regulamentu no lei ba membru sira iha baze, halo rekrutamentu  ba ema nain haat ba administrasaun, lojistika, finansa no media ba organizasaun no halo edifísiu ba organizasaun

Nia informa, konstrusaun sede nian  sosa rai husi apoiu fundu ne’e mak labele karik organizasaun iha rai rasik bele halo konstrusaun ba uma no karik sede iha ona halo rehabilitasaun deit ne’ebe organizasaun Padjadjaran iha ona fatin (padepokan) hodi rehabilita para atende membru sira no ba rekrutamenntu ema nain haat ne’e para ajuda ho jere organizasaun la’o diak tanba durante ne’e observasaun husi governu kuaze administrasaun ne’e fraku hotu kedas tanba ne’e governu halo rekomendasaun ba ida ne’e no apoiu finanseiru sei ho nia kriteria rasik husi governu ne’ebe organizasaun sira la’o tuir deit.

Teotonio akresenta, orsamentu ne’e foin ba dahuluk governu apoiu ba organizasaun Padjadjaran ne’ebe agradese ba governu tanba bele ajuda organizasaun hodi fo biban ba juventude sira ne’ebe hamahan an iha organizasaun ne’e para bele fo kontribuisaun ba dezenvolvimentu Timor-Leste nian

Entretantu, orsamentu ne’e governu fo hanesan teste ida ba organizasaun para oinsa dezenvolve ho diak tanba la jere ho diak problema ba organizasaun laran,  durante ezistensia tinan 35 nia laran sira jere tuir forsa organizasaun maibe seidauk hetan problema ba orsamentu nian ne’ebe sira sei utiliza hodi hadia diak liu tan organizasaun ba buat ne’ebe sira seidauk halo ba futuru mai.

Lider ASPN ne’e aumenta tan, objetivu dahuluk husi orsamentu ne’e hadia sede (padepokan) tanba ida ne’e iha mak bele halibur membru sira atividade sira hanesan halo formasaun no desportu nian liu husi kompetisaun  no apoiu finanseiru ne’e prosesu foin hahu ne’ebe sira halo ona enkontru ho parte KRAM nian ne’ebe sei hamutuk ho organizasaun arte marsial sira para jere orsamentu ne’e, faze dahuluk loke konta bankaria organizasaun nian para iha semana dahuluk fulan marsu KRAM transfer orsamentu etapa dahuluk ho montante 31,000 USD  mai organizasaun Padjadjaran bainhira orsamentu transfer ona funsionariu nain haat ne’e mos halo ona rekrutamentu tanba sira pakote ida.

Estrutura ASPN ne’e afirma, agora ezistensia organizasaun Padjadjaran iha Munisipiu 13 ona hela Oe-Cusse deit ona mak seidauk iha no sira iha membru rua, regular mak membru ativu hamutuk  ema nain-16,000  hamutuk ho la regular  hanesan konseleiru sira hamutuk ema nain-18,500 ne’ebe submete ona ba KRAM.

Jornalista : Augusto dos Santos